Centridiestre
«Fâ une Uti tant che la provincie cun Udin coordenadôr»
Pietro Fontanini, 65 agns, indotorât in Sociologjie e insegnant, al è stât president de Regjon Friûl-Vignesie Julie dai 3 di Avost dal 1993 ai 11 di Zenâr dal 1994 e po president dal Consei regjonâl, senatôr e par dôs voltis deputât. Al è president de Provincie di Udin dal 2008, confermât dal 2013. Di simpri autonomist e po leghist, al è candidât di Forza Italia, Autonomia responsabile, Identità civica, Lega Nord, Fratelli d’Italia.
Udin tant che “capitâl dal Friûl”. Il dibatiment, su chest teme, al è ferbint. Ce pensial? Cuâl rûl pensial che e vedi di vê la citât?
«Udin e je simpri stade la capitâl dal Friûl, ma e à di dimostrâlu. Vuê e je la citât de salût, de energjie nete e vie indevant, ma no à un rûl pal Friûl. Cemût vêlu? Puartin a Udin la Agjenzie europeane pes lenghis mancul pandudis; fasìn, come in Catalogne, la Cjase de identitât furlane, par fâ viodi e capî che achì al vîf il popul furlan; sburtìn ancjemò di plui sul turisim. Tra l’altri, o vin tal palaç Patriarcjâl la colezion di sculturis di len plui siore de Europe».
In ce relazion aie di metisi cul teritori?
«O speri che si puedin ricomponi lis Unions teritoriâls intercomunâls di mût che si torni a vê une aree vaste che e sedi tant che dut il teritori de atuâl provincie di Udin. In cheste suaze, Udin e à di vê un rûl di coordenament».
Cuâl pês aie di zuiâ in Regjon?
«Cu la Regjon i rapuarts a àn di jessi tornâts a ecuilibrâ: la Zonte di Debora Serracchiani e à lavorât pe grande part par Triest, dant sburt al puart e rindint pussibil dome par cheste realtât la citât metropolitane. O vin di cuintribelançâ chest. Si à di lavorâ par che al Friûl i vegni ce che i spiete».
Ce pensial di fâ pe lenghe e pe culture furlanis?
«Te Cjase de identitât furlane che o pensi, la culture e la lenghe furlanis a àn di vê une impuartance strategjiche, par contâ ancje par mieç di lôr ce che al è il Friûl. Nol covente inventâ nuie, baste copiâ ce che al è stât fat in Catalogne».
Su cuâi fronts pensial di intervignî in maniere prioritarie in câs di elezion?
«Par prin, al tocje meti a puest lis stradis, i marcjepîts e lis lûs, che la int e à dirit di vê chestis robis a puest. Po e je la cuistion de sigurece: o tornarai a puartâ i vigjii sot il control dal Comun e no de Uti, e si varà di fâ ancje cualchi convenzion cu la vigjilance privade, come che a àn fat a Pordenon. E po tocje tornâ a fâ la citât atrative dal pont di viste comerciâl, ancje cu la promozion dal teritori».
di Antonella Lanfrit
