Vinars ai 10 di Jugn aes 17.45 e je state le ultime pontade di Maman! le prime trasmission televisive par fruts dute in marilenghe curade e realizade de ARLeF (la Agjenzie Regjonâl pe Lenghe Furlane) in colaborazion cun Telefriuli.
Ogni pontade e je dividude in diviersis rubrichis: e scomence simpri cognossint – dentri o fûr de cjasute di Daria Miani (la presentadore) e dal so gjatut Vigji – ospits diferents, ven a stâi cjantants, atôrs, scritôrs, cogos, mâcs, gjornaliscj, musiciscj e tancj altris personaçs dal Friûl. Dopo, un daûr chel altri: il zûc pai frutins a cjase, tirât fûr dal gjornalut Alc&Cè, i cartons animâts di Omenuts dulà che i pipinots a vivin esperiencis straordenariis fevelant par furlan, la rubriche 99 Peraulis par imparâ peraulis in diviersis lenghis, e un mût di dî o un proverbi. Cun di plui, si puedin scoltâ diviersis storiis tal cjanton A ogni frut il so librut e une volte al mês e je ancje la rubriche di Mastercogo, par imparâ a cusinâ tantis robutis buinis. Tal cjanton de pueste eletroniche, invezit, si puedin viodi videos dulà che ducj i fruts che a vuelin a puedin recitâ contis, filastrocjis o barzaletis in lenghe furlane e vignî fûr in television. Par finî, tal cjanton Cressi cun plui lenghis, si puedin viodi curtis intervistis che a promovin il plurilinguisim te infanzie.
Par organizâ ce fâ in ogni pontade. Daria si cjatave prime cun ogni invidât te sede Arlef par pensâ insiemi l’argoment di tratâ; po dopo, a cjase, e butave jù i dialics, ideant simpri argoments gnûfs e si confrontave cul grup di lavôr de Arlef: il regjist di Telefriuli Luca Fornasiero, Priscilla De Agostini e Linda Picco che si ocupin de supervision linguistiche e dal coordenament dal progjet.
Al è stât ancje util par Daria, tant che mestre de scuele de infanzie, mostrâ lis pontadis ai siei arlêfs e osservâ cun atenzion cuâi che a jerin i argoments o i temis che ur plasevin di plui o che ju fasevin plui divertî. Cun di plui, nus à dite che no à podût fâ di mancul di cjapâ ispirazion dal program che e à simpri seguît cun tante amirazion, di piçule insù, ven a stâi L’Albero Azzurro, e altris format che si cjatin in rêt, e che e je stade contentone de libertât di impostâ pontadis e ideis su la fonde ancje des sôs passions.
Cheste edizion e je une vore plasude a la int e ai fruts, la int e ferme Daria pe strade, i fruts le cognossin e si visin di jê: e no sal spietave propit! Cun di plui, di Zenâr fin cumò, a son rivadis a passe 11.000 lis visualizazions su Youtube, cun numars che a incressin di setemane in setemane: al è dal sigûr un grant segnâl che il program al à plasût, e chest lu confermin ancje i dâts de emitente televisive.
Le seconde edizion che e partirà cul gnûf an scolastic varaie cualchi novitât in plui? La ARLef e dut il staff de redazion a son daûr a pensâ a une gnove stagjon ma… no nus anticipin nuie, clâr! Par cumò a invidin ducj i fruts a viodi lis replichis su Telefriuli, che a laran in onde vie pal Istât e a ricuardin di mandâ ae redazion (maman@tvstar.con) un lôr filmât dut par furlan par viodisi in onde cu la gnove edizion.
di Sara Palluello
