IL FERÂL. Te colme des vacancis

L’Istât al è un timp gjenerâl di vacancis. Si tache in Jugn e si siere in Setembar il timp des feriis; ma al è sigûr Avost il mês là che dut o cuasi si ferme. Tun mont frenetic, e je une dibisugne interiôr di cjatâ moments e timps di distacâ, di fâ alc altri. Gno pari, che al faseve il contadin di chei di une volte, nol sintive bisugne di vacancis, di fermâ il lavôr. La vite e jere in armonie cu la fadie e cul polsâ; il cambiâ dai lavôrs seont des stagjons nol puartave a stufâsi, a sintî bisugne di evasion. Al è di sperâ che ancje il timp dal distacâ nol deventi vuê une altre maniere di alienazion, une forme ulteriôr di intosseament spirituâl, psicologjic e fisic.
E tocje pensâ ancje ai tancj che no puedin lâ in feriis parcè che no àn nancje il lavôr! (pre Roman Michelot)
Ferragosto. Lis feriis di Avost, par celebrâ la glorie e la memorie di August e il passaç dal Istât al Atom. Zornadis di grande matetât e licence, là che e jere improibide dome la serietât e la misure. La glesie, galiote e inteligjente, ti à ficjât la fieste de Sunte, par celebrâ la glorie e la memorie de mari dal Signôr e il so passaç de tiere al cîl, dal transitori al definitîf. Cumò al somee che si sedi tornâts a la edizion origjinarie de fieste, deventade la colme de evasion e dal divertiment. Mi pâr di viodi i miârs e milions di talians ducj impegnâts al spasim a no fâ un colp, par onorâ lis vacancis bramadis e sassinadis. Cui al svuacare libar e beât ta la aghe, cui si rustìs tal savalon, cui cjale incocalît il cîl iluminât des fusetis, cui al sprofonde tun laip di gjelât par parâ jù la arsetât vere o finte che lu consume.
Come tancj di lôr, jo o ai passade cheste zornade di feriis e di fieste a cjase. Parcè che, come predi, o ai di servî doi paisuts e parcè che, come malât cronic e dipendent, no pues lâ ator. Però o ricuardarai istès cun grant traspuart la fieste de Sunte, par nô di Visepente titolâr e duncje ancje perdon. Un dai perdons plui serens de mê vite. Di meti firme.
O ai scomençade la mê zornade te mê comunitât adotive e adotade di Vilevuarbe. Scugnint jessi plui matutins, mi spietavi il solit troput di fedêi che a vegnin ancje se la puarte de glesie e je sierade, come chei che si confessavin di no vê stât a jespui ancje cuant che nol jere plui. A son i stakanoviscj de religjon, che no cjalin ni al predi ni al lunari ni al timp. E tantis voltis nancje al altâr. O ai cjatade invezit une biele gleseade e ti vin fat un mieç pontificâl. Cussì mi soi presentât plui cjariât al perdon di Visepente, aes 10 e mieze. Un glesie furnide come une nuvice, un plenon di int cun largje partecipazion ancje di fûr, un sflandôr di liturgjie cun cjants, incens, predicje di sagre e procession pal paîs.
No si visavisi di une fieste cussì biele e jo no mi visavi di une consolazion cussì dolce. O sin jessûts di glesie cui vôi che a ridevin e il cûr che al cjantave. A misdì o ai gustât cul muini e cu la femine, Gjovanin e Ivana, la mê famee di adozion. Par ringraciâ il Signôr e la Madone che mi vevin judât, tal dopomisdì o ai decidût di lâ a cjatâ un fantaçut di 18 agns di Rivis Darcjan, che di frut sù nol cjamine ma che al à une bontât straordenarie e al svole cu la sô anime monde e lizere. O vin fevelât a lunc, su la famee, dal dolôr e de sperance, des rispuestis inadeguadis e de fortune di cjatâ une fede fuarte. I ai dade ancje la comunion. O ai invidiade la sô bontât.
Za che o jeri inviât, o ai fat un salt a Maian, li di mê sûr, par coltâ ancje i rapuarts di sanc, che no son simpri i plui cjalts ma che a coventin. Tornât dongje strac e content, o stavi contemplant te pâs de sere il gno curtîl dut vert pes ploiis avostanis cuant che il cûr mi à tacât a trotâ come chel dai crots. De canoniche viere e stave saltant fûr la gjate cuntun colomp te bocje. Il colomp al daspave disperât e duncje al jere vîf. O ai fat lis scjalis a varcs e i ai corût daûr fin che no le ai incjantonade e, a sun di vitis, i ai fat molâ il colomp. Al jere dut spaventât e nol veve fuarce di svolâ. Lu ai cjapât e puartât lontan, al sigûr dai gjats. O soi convint che le vedi scapolade. Che al svoli ancje par me e par chei che no puedin movisi.
No podevi sierâ cheste biele zornade cuntun segnâl di vite plui biel. ❚
pre Antoni Beline, Cirint lis olmis di Diu 20.08.2006