EDITORIÂL – Daspò di cent agns no àn domandât ancjemò perdon

✽✽ Une foto, un dissen al pues jessi plui fuart di tantis peraulis. E viodût che il nestri “no” a dutis lis manfrinis talianotis e regjonâls pal centenari dal ’15-’18 al vûl jessi il plui fuart pussibil, o vin decidût che la prime pagjine di chest numar e fos propit la rapresentazion dal nestri disdegn viers dutis lis formis di celebrazion de prime vuere mondiâl. No dome pe tragjedie umane dai milions di muarts, pes conseguencis che a son nassudis dopo la sô fin e che a àn puartât ae seconde. E nancje dome parcè che in Friûl e je stade une vuere tra fradis, che e à sdrumade la economie, puartant miserie e emigrazion.
✽✽ No, parcè che la retoriche, lis bausiis, la disinformazion su chê vuere a son lis fondis pes bausiis dal dì di vuê. Il pinsîr, mai metût in bande dai sorestants talians, che e jere la cuarte vuere “risorzimentâl”, al puarte cun se la concezion “teologjiche” dal stât centrâl, la ideologjie de romanitât imperiâl. Nol è duncje un câs che dongje de basiliche di Aquilee il fassisim al vedi tirât sù il monument ae love capitoline.
✽✽ Perifariis che no àn di contâ nuie, buinis dome par jessi dopradis dai soldâts, par tirâ sù confins. Par ordenâ e par fâsi ubidî, tasint par no jessi scufiotâts.
Ma a son storiis di chel altri secul, al disarès cualchidun.
✽✽ A part che il ‘900 al jere fin chê altre dì, ancje se vuê no si fevele di canonadis, us someial che la paronance dal stât talian viers il Friûl e sedi pardabon mudade?
Podìno vuê afermâ che i furlans a sedin parons de lôr tiere, che a puedin decidi di bessôi su la aghe, sui flums, sui cjamps, su lis monts o invezit lis nestris risorsis sono tes mans des grandis impresis talianis e des multinazionâls?
✽✽ No saran plui esercits che a van e a vegnin pai paîs dal Friûl, ma o vivìn sot di une altre ocupazion, forsit plui pericolose di chê di prime.
Un om cu la sclope al è facil di viodi e di combati, chel che si infiltre vistût di civîl, cuntune biele batule, fevelant di progrès e di modernitât, al è bon di cjatà tancj arlêfs ancje culì.
Stupiduts, se no fossin ancje traditôrs.
✽✽ La storie dal Friûl e je plene di personaçs che a àn simpri pensât ai lôr interès e no a chei de comunitât. Se o metìn dongje ancje l’individualisim che si puartin daur, al sarà ancjemò plui facil lâ indenant cu la lôr strategjie.
✽✽ Lâ cuintri lis celebrazions dal centenari no je duncje dome une necessitât storiche e morâl. Pai furlans al vûl dî gjavâsi di intor une cjamese di fuarce, disfâ un laç tal cuel: liberâsi di chê “Piçule Patrie” che e sune tant che suditance a une plui grande.
✽✽ O disevi che no je dome une cuistion di onestât inteletuâl.
Cognossi la storie di un popul, al vûl dî meti vuê su pe taule di cualsisedi program e progjet di difese de specialitât e de autonomie, la cjarte de clarece.
Mi somee une vore dificil dâi credince a cui che nol à domandât mai perdon par chel che al è sucedût. E a son aromai 100 agns.❚
Dree Valcic