FRIÛL EUROPE. Il Nobel pe Pâs ae Union Europeane: un ricognossiment e un incoragjament

Il Nobel pe Pâs dal 2012 al va ae Union Europeane. Lu à decidût ae unanimitât il Comitât norvegjês che al sta daûr dal premi. In cheste maniere e je stade ricognossude la funzion impuartantone che il procès di integrazion continentâl al à vût pe pâs, pe democrazie e pai dirits umans in Europe, a tacâ de fin de Seconde Vuere Mondiâl fintremai al dì di vuê.
Il premi al rive intune fase une vore dificile sei de vite istituzionâl de Union sei dal percors di unificazion intal so complès e cussì al cjape sù ancje un altris significât. Cun di fat, par doprâ lis peraulis di Jacques Delors, un dai protagoniscj dal rilanç dal procès di integrazion tai agns Otante, si pues dî che il Nobel al è ancje «un incoragjament a lâ indenant su chê strade e fâ sù la Europe unide».
Un ricognossiment par ce che al è stât fat, un incoragjament par che no si pierdi cheste direzion tal avignî, ma salacor ancje alc altri. Dongje dai efiets positîfs de integrazion europeane pe pâs tal continent e soredut te sô part ocidentâl, il Premi in maniere implicite al somee meti in evidence propit i ponts debii di chel procès e des istituzions che ancjemò in dì di vuê a son clamadis “comunitariis”. Magari cussì no, e je ancjemò masse pocje Europe e chest si lu viôt in particolâr par ce che al tocje la presince de UE par difindi e garantî la pâs tal mont.
In dì di vuê a nivel mondiâl la Union no conte nuie e a contin – o a crodin di contâ alc – dome i siei Stâts membris, che a tacâ dal Ream Unît e de France a fasin a gare a cui che al mostre di sei plui fuart e plui autorevul par so cont o in relazion cui Stâts Unîts de Americhe. Cussì, in sostance, no esist une vere politiche de Europe viers il forest, cemût che al salte fûr in dutis lis situazions di crisi, dal Afganistan ae Sirie.
Claudio Cressati, che al è president regjonâl dal MFE (Moviment federalist european) e de Academie europeiste dal Friûl-VJ e che al insegne Storie e politichis de integrazion europeane li de Universitât dal Friûl, al conferme cheste analisi e al zonte: «Al è ancje par chest che al covente rinfuartî la UE e dâ aes sôs istituzions plui competencis e plui sovranitât su fondis democratichis». Un ricognossiment e un incoragjament. ■
MARCO STOLFO