LADINIE. Cjape il sac e va pal mont

Ancje chest an ve rivât, in cuatri e cuatri vot, il mês di Avost. Chel che in dì di vuê al è – almancul pai plui fortunâts – il mês de polse e des feriis tra mâr e monts, un timp al jere il mês che al viodeve tornâ tes fameis e tai paîs i emigrants partîts pal forest.
Cirìn, duncje, di tornâ indaûr cu la memorie a chei cjalts mês di Avost dai nestris emigrants sparniçâts pal mont, contant lis lôr storiis di vite, il lôr lâ e tornâ tra partincis e cumiâts, ingropaments di cûr, afiets, leams e lidrîs…
I LADINS DOLOMITANS_ La mancjance di risorsis, une economie puare fate di pure sussistence e lis dificoltâts de posizion gjeografiche e dal clime a forin lis causis de emigrazion di tancj ladins tai secui passâts. Za a tacâ dal Cinccent i ladins si usarin a lâ vie de mont vie pal Invier par fâ voris di cumierç ambulant e artesanâi tes valadis e sul confin. Tancj i cjalçumits e guis dal Cjadovri, i pitôrs e decoradôrs dal Fassan che a levin viers la Austrie, come che si lei tai messaçs lassâts tun ripâr alpin su la strade par Salisburc (Krimmler Tauernhaus), là che si conte la soference dai emigrants di stagjon.
Tal Votcent la emigrazion si slargjà al forest, deventant permanente. I oms ae ricercje di lavôr e di une vite miôr a partirin in direzion de Americhe dal Nord (Stâts Unîts) e de Romanie par lavorâ prime tal setôr dal len e dopo tes minieris e te costruzion des feradis.
Ae fin des dôs vueris mondiâls, la emigrazion e tornà a cressi par vie de puaretât sbrocjade fûr dai conflits, e i ladins a finirin in Canadà, Australie, Argjentine e Venezuela, ma ancje in Europe pai lavôrs di stagjon.
Tai agns Cincuante il Guvier talian al fasè acuarts cun diviers paîs europeans par baratâ emigrants cun materiis primis. Lis condizions lavorativis no jerin cussì buinis, stant che si jere dispès emargjinâts, sot paiâts, no tutelâts, come che a dimostrin lis tragjiedis di Marcinelle te Belgjiche (1956) e Mattmark in Svuizare (1965), là che diviers ladins a cjatarin la muart.
IN FRIÛL_ La emigrazion de Cjargne viers la Gjermanie e la Austrie e scomençà tal Cinccent, come pai ladins dolomitans. Tiessidôrs, marcjadants ambulants (cramârs) e artesâns a jessevin di cjase tes stagjons muartis de agriculture par integrâ i lôr piçui vuadagns.
Daspò la anession ae Italie i emigrants a sielzerin sedi la Europe dal Est e dal Ovest (tai agns de “fiere” de industrializazion e des costruzions), sedi i puescj di là dal Ocean. Resistencia, Colonia Caroya e Avellaneda a son trê esemplis di citâts argjentinis fondadis dai furlans sul finî dal Vocent. La emigrazion stagjonâl, invezit, e puartave chei di Glemone, Tresesin e Sant Danêl viers la Ongjarie e la Austrie a rivendi formadis, cjars e oparis di len, chei di Codroip a Rome pal mistîr di çambarlans, i curtissârs di Manià in Gjermanie, i osovans tal Est de Europe par fâ sù la Transiberiane, chei di Buie tes fornâs de Belgjiche…
Te prime vuere mondiâl si sierarin in maniere definitive lis destinazions viers la Europe centri-orientâl, ma e cjaparin fuarce lis metis de Australie, Argjentine e Venezuela. Tai agns Trente, sot dal Fassisim, si inmanearin i spostaments dome viers il Nord Europe (par vie de aleance cu la Gjermanie) e viers “l’Agro Pontino” pes bonifichis.
Ae fin dal secont conflit, il scugnî emigrâ nol cambiâ come destinazions e dificoltât.
Intai ultins agns, i lavoradôrs che a van cualchi mês tal forest daûr des impresis talianis a àn cjapât il puest dai vecjos migradôrs (emigrazion “di cantîr o tecnologjiche”).
TAI GRISONS_ La emigrazion e fâs part de storie ancje dal cjanton dai Grisons. Come in dute la aree alpine, la scarsitât di prodots de tiere e obleave a cirî furtune cun altris mieçs. I Svuizars di chiste zone, alore, a levin tal Nord Ovest de Italie par lavorâ come manovâi o muradôrs, e te Republiche Venite come marmiscj, sblancjadôrs, vedreârs. Ma i Rumançs de Val Posclâf, de Val Bregaie e de Engadine si faserin ricognossi specialmentri pe art de scaletarie, dal cafè e dal licôr. Tacade a Vignesie tal Sîscent, la grande difusion di cheste ativitât e scomençà tal 1766, cuant che la firme di un tratât tra i Grisons e la Austrie e fasè imbesteâ la Serenissime che ju parà fûr de sô tiere. Di ca la diaspore dai scaletîrs Rumançs in dute Europe. A chescj si zontin chei che a cjatarin di vore in Australie come boscadôrs e contadins. ■
Ilarie Colùs