Sfuei Mensîl Furlan Indipendent
Archivi de Patrie

CULTURE – Luoghi e immagini della religiosità… e Sants e madonis a man drete

............

Gianluca Comar, Maurilio Tramontini, Luoghi e immagini della religiosità nella bassa friulana, Aiello 2008.
Istitût comprensîf diestre Tor di Daêl, Sants e madonis a man drete
de Tor NUS CJALIN
, Daêl, 2008

A mieze strade jenfri li che cumò a son i paîs di Sant Vît de Tor, Crauì e Tapoian, une volte al jere un paisut che si clamave Palasi. Al veve tant che sant protetôr S. Jacum. E cussì, cumò, di un pôcs di agns in ca, une associazion culturâl che si clame Tormilaghis, e fâs une piçule fieste, li che al jere Palasi, ogni 25 di Lui.  Chest an la ocasion e je stade buine par presentâ chest libri di Comar e Tramontini, risultât di un lavoron di ricercje e di studi.
Un biel libri cun 176 pagjinis in formât 30 par 21, plui di 350 fotografiis, dutis cuntune didascalie, lis mapis dai paîs, in mût che il letôr al puedi orientâsi.
Si fevele di glesiis, di gleseutis, di anconis, di pituris, di capitei e v.i. Vâl a dî dutis lis manifestazions che la devozion popolâr e à lassadis dilunc vie dai secui intal tiessûts urban e extra urban di chescj paîs: Alturis, Cjamplunc, Cjavençan, Crauì, Dael, Muartisins, Naiarêt, Navuacs, Perteulis, Privan, Rude, Sacilet, S. Nicolau, S. Vît, Strassolt, Tapoian, Vuanis, Visc.
Par ognune des glesiis e ven dade la tipologjie, la ubicazion, la proprietât, il cult e lis tradizions, une descrizion e une ambientazion, lis origjinis e lis trasformazions e, par finî, la cronologjie. Duncje une presentazion complete di ognidune di chestis imagjinis.
Ma il libri nol è dome chest. Al è ancje une miniere preseose di informazions di caratar storic. Il puest dulà che a son metudis anconis e gleseutis nol è a câs. Tantis ubicazions a àn a ce viodi nuie mancul che cu la centuriazion romane, vâl a dî che a àn daûr di se un par di miârs di storie.
E ancjemò: parcè cierts sants e no altris? Parcè tantis madonis? Parcè a Dael S. Nicolau e S. Durì si dano la volte? E S. Zuan Nepomuceno, che al vignive de Cechie (e che al à lassât olme di se ancje intai cognons di chenti, Mocchiut e simii)? E la Tor corie simpri inta chel stes jet di za fa 2.000 agns? (No, no cor inta chel stes jet…o magari sì, ma il jet nol è simpri intal stes puest).
Stes argoment pal libri editât des scuelis mezanis di Dael e Rude: plui di 250 pagjinis in formât 21 par 15. E ancje stes teritori, plui o mancul: a mancjin lis escursions intai comuns di Çarvignan (pe frazion di Strassolt) e di Bagnarie (par Privan), ma in plui e je Vile Visintine (che une volte e si clamave Camarcio). Dut scrit par furlan (cu la traduzion taliane insom dal libri, pp.202-251), cuntune grafie une vore curade e cence chei fai che masse dispès a scjampin, par vie che no simpri si fasin lis robis cu la atenzion necessarie.
Ancje culì tantis fotografiis (plui di 340), ma ancje tancj biei dissen dai arlêfs (un centenâr). E si capìs ce tantis materiis di scuele che a son jentradis in cheste vore: religjon, che ben si intint, talian, art e imagjin, storie, gjeografie, lenghe furlane. Un preseament i va al prof. Chialchia che al à coordenade la ricercje (che e à impegnâts doi agns di scuele), ae dirigjente M. C. Rocco che  e scrîf la introduzion e a Ferruccio Tassin cu la sô jentrade, come simpri siore di riferiments e di notazions finis. Ma, si capìs, plui di dut, ai fruts che la ricercje le àn fate.
Doi libris di tignî a puartade di man, par consultâju tant che enciclopediis, par verificâ ce che si viôt passant pes stradis. E un invît a lis zovinis gjenerazions a lâ ator par chescj paîs a pît o in biciclete e a cjalâsi ator: di robis bielis di viodi a ‘ndi è tantis, baste alçâ un tichinin il nâs e no tignîlu simpri incolât sul telefonut…
Laurin Zuan Nardin

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +