Sfuei Mensîl Furlan Indipendent
Archivi de Patrie

TERITORI – La Austrie e je la Bio-nazion Numar un in Europe!

............

Ancje cence cognossi lis statistichis, ognidun lu podeve viodi che tai ultins agns o vevin un vêr bio boom: il numar dai prodots biologjics tai supermarcjâts al cres di un continui. Agns indaûr no ‘nd jere nuie altri che cualchi prodot fat di lat biologjic e in plusôrs lûcs nancje chest. Vuê in ogni puest di vendite o cjatìn scuasit par ogni prodot une sielte alternative di divignince biologjiche – clâr, une alternative che e coste 30%-100% di plui -.
Secont Eurostat 80/2007, lis plui altis proporzions di aree biologjiche si regjistravin tal 2005 in Austrie (11,0%), Italie (8,4%), Republiche Ceche e Grecie (7,2%). Un dai obietîfs dal Ministeri de Agriculture al è chel di dopleâ la aree: dal atuâl 14% dal 2008 al 20% dentri dal 2010.
IL RIMPIN CUINTRI I BIO PRODOTS AL È IL LÔR PRESIT «MASSE SALÂT»_ Secont BIO AUSTRIA (Portâl de Agriculture Biologjiche Austriac) (1/08) tal 2007 lis venditis di prodots biologjics a àn regjistrât il 6% dal faturât totâl pai prodots alimentârs (il 64% dai prodots biologjics si spacin tai supermarcjâts). Une analisi di marketing (Bio Austria 2/07) e dîs che pe maiorance de int (tal 2003 il 46%, tal 2007 dome il 33%) il rimpin cuintri i prodots biologjics al è il lôr presit “masse salât”. Plui dispès si compre lat (57%), cjar bovine (52%) o polam (51%); cun di plui, la divignince biologjiche e je considerade une vore impuartant tal câs dai ûfs (77%).
LA AUSTRIE E JE IL PRIN PAÎS DE UE CHE E VIERÇ LIS BATARIIS ANIMÂLS_ Daspò dal prin di Zenâr,  l’arlevament in gabiote convenzionâl di gjalinis al è improibît. La Austrie e sarà il prin paîs de UE che e vierzarà lis batariis (i svuizars lu vevin fat za tal lontan 1992): inaltrò, te UE, lu vuelin fâ dome dopo il 2012.
Chest pas al vûl dî molâ il sisteme che al proviôt la ventilazion artificiâl e la lûs sfuarçade di un continui par parâ sù la produzion. Une torture pai nemâi, cence nissune pussiblitât di movisi, suntun teritori di 550 cm2, vâl a dî l’88% de largjure di une pagjine in formât A4.
Il piês dal piês a son i dams psicologjics: lis gjalinis a disvilupin un compuartament agressîf fin al canibalisim.
In Austrie si consumin ogni an 2 miliarts di ûfs, ven a stâi plui di 235 par persone. Par sigurâ chest numar a coventin plui di 6,7 milions di gjalinis. Grazie al disvilup dai ultins agns, il 38% dai ûfs si vendin in mût alternatîf, par vendite direte o tai marcjâts dai contadins.
Fûr che pocjis ecezions, ducj i supermarcjâts in Austrie a àn bandît dal lôr sortiment i ûfs des batariis animâls. I ûfs industriâi a vegnin doprâts te industrie alimentâr.
La organizazion pe protezion dai nemâi Vier Pfoten (Cuatri talpis) nus vise ancje che si va indevant cu la pratiche di distermini dai mascjos. In Austrie, dome tal 2007 a àn fat fûr «dibant» 6,3 milions di poleçuts (Statistik Austria), ven a stâi la metât di dute la produzion di poleçuts. Chest metodi al è impleât in ducj i gjenars di arlevaments, sedi tes batariis classichis o in chês modificadis, tes volieris, tal viert o te produzion bio.
Janez Erat

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +