SPECIÂL – Ganzit: il furlan i ten plui ae sô cjase che al so ort

Ancje tal ort che o vin dongje cjase, che al sedi grant o piçul, si pues coltâ e lavorâ la tiere lant daûr dai principis di chê che si clame “agriculture biologjiche”. Par vê cualchi consei su cemût che si pues fâ, o vin sintût Grazian Ganzit, agronom, president de Associazion dai Produtôrs Biologjics e Biodinamics dal Friûl Vignesie Julie.
Lui al è ancje perît agrari, e di sigûr al cognòs ben il mont de agriculture furlane. Ce puest aial o aial vût l’ort pal contadin furlan?
Un puest impuartanton. Però o scuen rimarcâ che il fat di jessi perît agrari al vûl dî pôc e nuie: chest par vie che i diplomâts e i laureâts in agrarie par solit no san cuasi nuie sul rapuart jenfri l’om, la tiere e lis plantis. Par dî une, te facoltât di Agrarie de universitât dal Friûl almancul l’80% dai professôrs al è cuintri dal biologjic; fra i cinc istitûts di agrarie de nestre regjon, dome in chel di Puçui si tocje chest argoment. Impen, te facoltât di Agrarie de universitât di Frankfurt in Gjermanie e esist une specializazion in Biodinamiche.
Ce rapuart aial il furlan cul so ort?
O disarès che il leam dal furlan cu la sô tiere al è dal sigûr fuart, ma salacor il furlan medi al è plui leât ae sô cjase, al “modon”, che ae sô tiere. Chest mi pâr pardabon strani: se si sacrifichìn tant pe cjase, no varessino forsit di fâ inmò di plui par tignî cont la tiere, che e je la fonde de nestre vite? Par gno cont il furlan al è plui muradôr che contadin.
Secont lui, vivi di ort e di agriculture isal pussibil in dì di vuê?
Al è une vore dificil, si lu sa. Dut câs, intune crisi come chê di cumò e che magari cussì no e larà ancjemò in piês, vê un tocut di ort al è une vore impuartant, al da la sigurece di vê simpri alc ce mangjâ. Chel che al varès di jessi il pilastri de societât furlane, come che di secui in ca al è simpri stât, si cjate cumò a jessi une vore debil: la nestre agriculture e fâs part di un sisteme di suditance che nol permet di jessi libars. Jo o ai chê di dâi di gnûf ae pratiche agricule la impuartance che e merte, par une agriculture libare e no incuinade.
Cemût si puedial rivâ a chest obietîf?
Purtrop la sience agricule atuâl e je stade costruide dome a pro de industrie e dal vuadagn; la prime conseguence e je stade che i contadins no àn plui coltât la tiere te maniere juste. Par esempli, il plui des voltis si met insieme ledan e diviers sâi; par chest, la tiere e domande simpri plui aghe, la aghe stesse e reste a uns 15 centimetris sot tal teren e la plante e tache a patî e a vê malatiis.
Ce influencis aie vût cheste moderne “industrie agricule”?
Il probleme di vuê al è che la Nature e je metude une vore sot pression di bande dal om. Par esempli, lis plantis dal ort di cjase in citât a patissin un grum l’incuinament luminôs. Viodi la lûs ogni dì par 24 oris su 24 al mande la plante “fûr dal semenât”, cussì che no rive adore di fâ ben il so lavôr.
Un altri cantin une vore delicât al è chel des semencis che o doprìn tai nestris orts. Jo o consei simpri di fâlis par nestri cont, par vie che dispès chês che o comprìn, metudis tai sacuts in vendite tai negozis, a son vanzums di semencis, debilis, cence vite. Bisugnarès tignî indiment che, se ae fin de stagjon la plante no à menât come che si spietavisi, al pues ancje no jessi colpe dal ortolan, ma ben de semence di scjarse cualitât che nus vendin lis grandis aziendis.
Une situazion pardabon ingredeade: ce si puedial fâ?
Lis industriis che a àn a ce fâ cul mont de agriculture a vendin la miôr semence aes grandis aziendis produtoris, po che di cualitât medie ai vivaiscj, tal ultin ce che al reste al va a cui che al ten l’ort par passion. Stant che po tal nestri ortut la plante e stente a cressi o si inmale, si bute une vore di sâi te sperance che e ledi in miôr; ma cussì la tiere si strache, no je plui fertile, e par che e resti fertile si butin simpri plui sâi intun circul viziôs cence fin.
Tal nestri ort, cemût si puedial lâ daûr di ce che e proviôt la agriculture biologjiche e biodinamiche?
Si pues fâlu, sigûr, ma si scuen vê almancul un minim di cognossincis. Nol baste no butâ aes plantis nuie di chimic o aplicâ il mût di coltâ tradizionâl tramandât di gjenerazion in gjenerazion, che in cierts aspiets al è propit falât. La robe miôr al sarès lâ daûr di ce che al dîs un espert dal setôr, bon di doprâ une “gjenetiche dolce” par svilupâ lis semencis.
E cumò cualchi sugjeriment pai ortolans che nus stan leint.
Par esempli, mai doprâ il ledan cemût che al è: al va simpri compostât par fâlu deventâ une medisine pal teren e duncje pe plante. In câs di teren intosseât par vie che si è doprât masse sâl chimic, semenâ senape stant che e rive a gjavâ il potassi, e jude a lavorâ il teren fasintlu deventâ l’an dopo come farine. Dopo vê semenât, cuvierzi la tiere cul stran e no cu la plastiche parcè che e scjalde masse il teren, fintremai a 50-60 grâts. Altre cjosse impuartante: cognossi il cicli lunâr, viodût che la lune e à un inflùs grandonon su la Nature. Si trate di cognossincis antighis cumò pierdudis, ma bisugne tignî cont che lis robis a son mudadis: il cîl, la tiere, il timp, lis semencis no son plui chei di une volte, duncje bisugne studiâ insot dut chest. Insome, va ben lâ daûr des tradizions ma cun atenzion.
Isal il câs di tignî seris tal ort di cjase?
Magari cussì no la culture de sere in Friûl no je tant cognossude. Une piçule sere ben fate e coste cualchi centenâr di euros, e e sigure une buine produzion. Al è impuartant però no tignî masse cjalt dentri, se no la plante e mûr, il teren si suie e al devente masse dûr.
Tal forest ce rapuart àno cul ort?
O ai vude la fortune di viodi cemût che, tal nord de Gjermanie, a tegnin i “orts sociâi”. A funzionin cussì: cui che al vûl al pues domandâ in concession al comun un toc di teren public fûr dal paîs par coltâ un pocje di robe. Al è un sisteme une vore valit par meti in contat la int, un vêr centri di vite sociâl li che si puedin vendi i propis prodots e scambiâsi ancje semencis e conseis su cemût tignî l’ort. L’ort di cjase al podarès duncje deventâ il comun denominatôr par creâ une gnove socialitât, tornant a costruî di gnûf un clime come chel che al jere, par esempli, tor des nestris latariis sociâls di une volte.
ALESSIO POTOCCO