ATUALITÂT – Lenghis, scuelis, teritori: leam di rinfuartî

CUNVIGNE_L’incuintri internazionâl che si è tignût sabide ai 15 di Otubar stâts li de sale polifunzionâl dal Comun di Sant Pieri dai Sclavons/Špeter al à permetût di frontâ e di confrontâ esperiencis a nivel european che a àn a ce fâ cul leam che al ten adun “Lenghis, scuele e teritori”, lant daûr dal titul de cunvigne stesse inmaneade dal Assessorât ae Istruzion de Regjon in colaborazion cul Comun di Sant Pieri, la Comunitât montane di Tor, Nadison e Cuei e l’Istitût comprensîf statâl cun insegnament bilengâl talian-sloven. Pe ocasion si son cjatâts adun esperts di politiche linguistiche, professôrs, mestris e dirigjents scolastics, il Segretari di Stât dal guvier di Lubiane pai slovens che a vivin tal forest Boris Jesih, l’assessôr regjonâl ae Istruzion Roberto Molinaro e il Diretôr gjenerâl dal Ufici scolastic regjonâl Daniela Beltrame.
ASSESSÔR_ Dopo il salût dal sindic di Sant Pieri Tiziano Manzini, che al à ricuardât cemût che vie pai agns la sô comunitât e à prime domandât e po difindût il dirit di vê scuelis bilengâls, l’assessôr Molinaro al à marcât che «ancje se no mancjin dificoltâts di caratar economic, la Regjon e sta fasint il so par puartâ indevant une azion coerente e costante par difindi il dirit dai fruts di cressi doprant a scuele lis trê lenghis ricognossudis par leç sul nestri teritori, sloven, furlan e todesc. Insegnâ lenghis a scuele al è fâ inovazion, stant che il plurilinguisim al è necessari par vê une vere citadinance europeane».
SETEMBAR 1984_Un cuadri de storie des scuelis bilengâls lu à fat la presidente dal Consei dal Istitût comprensîf statâl di Sant Pieri Elena Domenis, che e à ricuardât cuant che, tal Setembar dal 1984, cinc frutins a jentrarin pe prime volte te scuele pe infanzie a pene nassude. «Te scuele» e à dit Domenis, «si dopravin parie il talian, il sloven e il dialet des Valadis par che i fruts a cognossessin il mont ator di lôr e par che la nestre fevele no si pierdès dal dut». Plui tart, e nassè la scuele elementâr, parificade tal 1997; la leç 38 dal 2001 e à fat deventâ l’istitût statâl, duncje part dal sisteme scolastic de minorance slovene che e vîf in regjon. Te anade 2007/08 e je stade screade la scuele secondarie di prin grât. Cumò, tes primariis dutis lis materiis a vegnin insegnadis in dutis i dôs lis lenghis, invezit te secondarie cualchidune e ven insegnade par sloven, altris par talian. Magari cussì no, par vie di problemis ae struture che e da acet aes scuelis, par cheste anade i students a àn scugnût sparniçâsi in diviersis sedis, ancje fûr di Sant Pieri, in spiete de fin dai lavôrs.
ESPERIENCIS_ A presentâ altris esperiencis une vore validis a pro dal plurilinguisim tal mont de scuele a son stâts Miha Vrbinc, diretôr dal Liceu sientific federâl sloven di Clanfurt, Rosmarie Crazzolara de Intendence scolastiche ladine di Bolzan, Sergio Crasnich, consulent pedagogjic tes scuelis di lenghe taliane de Istrie slovene, il dirigjent dal Istitût omnicomprensîf di Tarvis Antonio Pasquariello e Marisa Comelli, mestre di Faedis, che e à ricuardât i dîs agns di vite dal progjet bilengâl furlan-talian che al cjape dentri 1600 students e 20 scuelis tal cûr dal Friûl.
Alessio Potocco