Sfuei Mensîl Furlan Indipendent
Archivi de Patrie

LA FABRICHE DAI… LIBRIS – CONTECURTE. La cjavre di Buri

............

di Fruts di Furlan – 3A e 3BScuele Medie di Buri: Francesca Cignola, Francesco Basso, Pop Bogdan, Lamberto Frosutto, Nicolas Iurlaro, Arjiol Murati, Chiara Pietropaolo
Al jere une volte un Re che si clamave Tite e al veve une cjavre che e cagave bêçs.
Re Tite al viveve tal cjistiel di Buri, al jere bon come il pan e al veve dôs fiis: Olimpie e Anute. Olimpie, la plui grande, e jere gruesse, brute e triste come l’asêt. La plui piçule, invezit, secje come un stec, ma biele e buine, tant di fâsi comandâ di sô sûr.
Une dì, il Strion di Manzan, invidiôs, al veve stramudât cuntun incjantesim un gjat intune bestie orende: cuatri voi, doi denant e doi daûr, i dincj a spice, curtìs tal puest da lis sgrifis, nûf codis.
Cun di plui al jere grant come lis culinis di Buri.
In cuatri e cuatri vot, il gjat al veve sdrumât il cjistiel e al veve glotût interie le cjavre.
Dopo chê disgracie, Olimpie, viodint il pari disperât, e decît di lâ a cjoli le cjavre.
Rivade a Manzan e viôt il gjat che al duâr, e cjate la puarte dal cjistiel vierte e, maraveade, e jentre.
Il Strion, biel come il soreli, la ferme e i dîs: «Mandi Olimpie! Ti plasaressial deventâ bielissime e plene di bêçs? Baste che tu deventis la mê nuvice!»
«Ma… pardabon?» i rispuint Olimpie «Sigûr che ti sposi!»
E cussì la fantate e jere restade tal cjistiel.
Rivade chê gnove, Re Tite si inmale pal displasê.
Anute, par amôr di so pari, e va ancje jê a cirî di cjoli la cjavre ancje se no à nissune sperance.
Il Strion, cu la sô bielece, al prove a freâle, ma Anute, ofindude, i rispuint di no.
E cussì al torne a cjapâ il so aspiet oribil e, rabiôs come un madrac, al comande al gjat di copâle.
Ma Anute, svelte, e tire fûr une surisute che e veve platât inte sachete. E cussì il gjat si piert vie a zuiâ e si dismentee di Anute.
Il Strion, rabiôs come un grivon, al menace Anute di stramudâle intune gjaline e jê i rispuint: «Ce scjars che tu sês! Prove a fâmi deventâ un cjan grant come une montagne, se tu rivis!»
Il Strion, stiçât, le gambie intun cjan paurôs di fâ trimâ.
Viodint chê bestie, il gjat da pôre al caghe fûr la cjavre e Anute e mangje il Strion un toc a la volte.
Muart chel, ducj i incjantesims a sparissin, Olimpie e torne brute ma buine e Anute e torne come prime. Re Tite, cul gjat e la cjavre, al vuarìs e ducj a tornin a vivi contents come Paschis.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +