Sfuei Mensîl Furlan Indipendent
Archivi de Patrie

TERITORI. Cine e mont a braç in Cjargne e no dome

............

Cuant che si fevele dal binomi cine e mont, ti ven subit tal cjâf il “Trento Film Festival”, la plui grande rassegne dedicade al mont de aventure tes monts. Di trê agns in ca però, ancje il Friûl – si ben in maniere plui contignude – al da il so jutori ae difusion di chestis oparis, che no son simpri dome sempliçs documentaris ma che invezit, plui dispès, si mudin in oparis cinematografichis.
I LÛCS_ Dal 24 di Otubar ai 5 di Dicembar, cuatri localitâts furlanis, spartidis tra mont e planure, a son deventadis centris di interès dal “Montagnacinema 2008”: Codroip, Comelians, Pontebe e Sant Denêl a jerin la sene par 35 oparis proietadis in cuindis seradis. Il teme de manifestazion e je stade la nature, protagoniste assolude di chest incuintri culturâl che al veve tant che obietîf chel di tirâ dongje ducj chei che a cjalin cun voli particolâr lis monts. Par fissâ il leam tra “MontagnaCinema” e il “Trento Film Festival”, sui schermis furlans e je rivade une sielte des miôrs oparis de rassegne trentine, che se no e varès vût un grum di dificoltât a cjatâ spazi intal normâl zîr cinematografic, par vie de particolaritât dai sogjets e dal public di nicje che i è dedicât chest argoment.
I JUTORIS_ A chest particolâr progjet, sore des cuatri aministrazion comunâls, a àn dade une man ancje “Officine d’Autore” di Sant Denêl, la associazion “Il circolo Lumière” di Codroip, il circul culturâl “Sirio”, l’Albergo Diffuso di Comelians e la sezion dal Club Alpino Italiano di Sant Denêl, Pontebe, Tarvis, Mueç, For di Avoltri e Codroip. Al è vignût fûr un calendari di apontaments une vore fis, bon di contentâ ducj i guscj. La rassegne “MontagnaCinema 2008” no je stade dome une ocasion par vê une largje panoramiche tal univiers dal cine de mont, de nature e de aventure, ma e je stade ancje une pussibilitât par cjatâ nons di bon rispiet, come par esempli Mario e Massimo Di Gallo che, dilunc doi apontaments dal titul “Atlantico: montagne nell’oceano”, a àn fat viodi i videos de lôr ultime imprese; o pûr, Lino Leggio che al à ilustrât le sô ultime fadie leterarie. Gjavât i nons, la volontât dai organizadôrs e je simpri chê: permeti a ducj di lassâsi puartâ vie de fuarte esperience di scoltadôrs e des imagjinis tant bielis di lassâ cence flât.
Tiziano Gualtieri

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +