SPECIÂL. Ai 18 di Dicembar premi pe miôr senegjature par furlan dal 2008

Joibe ai 18 di Dicembar, aes vot sot sere li dal Visionario di Udin, si davuelzarà la serade di premiazion de setime edizion dal Concors par tescj cinematografics in lenghe furlane, inmaneât come simpri dal Cec-Centro espressioni cinematografiche dal cjâflûc furlan dutun cui assessorâts ae Culture dal Comun e de Provincie di Udin e cul jutori de Nord Est Banca. La jurie dal concors 2008, componude di Marcello De Stefano (regjist e autôr cinematografic), Pauli Cantarut (gjornalist e organizadôr di events) e Stiefin Morat (poete e scritôr), e varà di consegna i premis pe Senegjaturis, pai Saçs sul cine e pes Storiis par film.
Cun di plui, dilunc de serade di premiazion a vignaran proietâts diviers curts, tant che il cuart volum de serie par fruts Omenuts cul titul di Il mont des ruedis (par cure di Massimo Garlatti-Costa), Le bande di Orzano e Tarvisio di Giorgio Trentin, Friuli.doc di Caterina Ongaro, Cos’è che cambia di Alberto Fasulo (prin documentari dal autôr dal cine Rumore Bianco), e Cormons cu la mude di Viarte di Eraldo Sgubin. Vie pe serade si tignarà la leture dramatizade di un toc dal lavôr premiât e po al sarà ancje presentât il numar 7 de riviste di cine Segnâi di Lûs.
Alessio Potocco