MEDIA – FRIÛL TAL ETERE. Patrie Award 2010

Oris e oris di incuintris. Consultazions cence pâs. Discussions di fûc e colps bas. Cavii e riunions flum. Ae fin i membris de «Academy» de Patrie a àn cjatât un compromès. E come ogni an, a la fin di un an, a àn fat il lôr consultîf, par consegnâ il premi «Terenzani» – premi omaç de critiche televisive che e cjape ispirazion dal anchor de redazion udinês di TelePordenon (Franco Terenzani, te foto in bande) e che al è spieli (ma no brute copie) dal «Terzani». Podaressin definîlu il so omolic catodic. Ve chi lis motivazions de assegnazion.
Premi «Terenzani» al personaç televisîf dal an. Lu din vulintîr al cjargnel Alberto Terasso (te foto), diretôr di Telefriuli, condutôr di «Operazion Effe» e altris programs di aprofondiment. Cun i siei ospits al à la potence di un Bruno Vespa. Di une robe i va dât at: ancje se al à passât un grum di agns te cjarte stampade, al va simpri in onde cu la cussience di jentrâ te cjase dai furlans. Cence tancj berlis. Che, forsit, al varà fat sintî in dute vie Tavagnà, daspò dai dâts pandûts dal Auditel, che a àn metût la concorint «Free» tant che plui spiade.
Premi «Terenzani» al personaç rivelazion dal an.  Lu din vulintîr a lis condutoris dal «Cosmo», il grant monitor dal stadi Friûl. Il mieç al è gjestît dal Udinese Calcio, che prime lu da in gjestion a Free, po a Telefriuli. Un pôc par sorte, insome, pûr di tignî bogns ducj. Dome che la conduzion si è stramudade intun match fra lis dôs condutoris Presello – Spangaro. A varessin di scjaldâ il public, ma e somee une gare te gare.
Premi «Terenzani» speciâl ae cariere. Cu la motivazion: «Une vite in paveute», nol pues no lâ al president dal Ordin dai gjornaliscj Pieri Villotta (te foto), l’om che al à fat de «paveute» la imagjin totalizant dal so stes gjornalisim. E di un gjornalisim targât Rai F-VJ. Cumò che al è lât in pension, cui nus restie? Une Marinella Chirico a câs? Un Armando Mucchino? Nô o brachin, braurôs: «Villotta forever». Ancje se ciertis declarazions ae Patrie…
Menzon «Bruno Pizzul» (il balon prin di dut). O varessin di dâlu a Lorenzo Petiziol (tal bol), diretôr di rêt di «Free». La sô trasmission de domenie «Sportissimo tutto Udinese» e je une sagre di paîs vignude fûr mâl, dulà che a servissin simpri chel mangjâ. Tant che ospit, i mancje dome la femine cu la barbe. Ma no varessino di fevelâ di balon? Il leitmotiv «Godete friulani» a ogni goal dal Udin al à stufât. Stufadiç ancje il personaç.
Cope «Daniele Damele» (vâl a dî: politiche e comunicazion).
Cence assegnazion. Nol esist in Friûl un program tv su la politiche che al sedi decent.
Targhe «Dario Zampa» al miôr program di intratigniment in marilenghe.
Al va al «Festival de cjançon furlane», manifestazion tornade in voghe sul palc dal Zuan da Udin, condusude dal stes Zampa cu la vedette Marina Presello (te foto). Une alchimie di vecjo e gnûf. Inzessât e spontani si viôt tai condutôrs. Par plasè, scancelait chês presentazions prime des cjançons. E soredut, mancul batudis tra i condutôrs: si viodevin a un chilometri che a jerin za stadis prontadis prime. «Actor’s studio» provincialot.
JAN TOTI