Sfuei Mensîl Furlan Indipendent
Archivi de Patrie

LA FABRICHE DAI… LIBRIS. Gabriele Zanello, Giovanni Battista Gallerio. Gli autografi delle poesie e delle prediche friulane.

............

Inte golaine Trois, Glesie furlane e publiche cheste rielaborazion di une tesi di lauree, su la figure di pre Tite Gallerio, nassût a Tresesin intal 1812 e muart a Vendoi intal 1881.
Si scomence cuntune note biografiche, par po viodi cualis che a son stadis lis ocasions dI scriture e la fortune di chestis scrituris.
Po si passe ai tescj, prin i manoscrits e po lis redazions a stampe. Daspò di un scandai sul laboratori dal autôr (vâl a dî ce maniere che al componeve) e je une penze note dialetologjiche che e descrîf la lenghe doprade dal pont di viste de grafie, dal vocalisim, dal consonantisim, de morfologjie e dal lessic.
Infin a son ripuartadis lis letaris a la contesse Catarine Percoto (che e jere sô compagne di etât) e a Zuan Domeni Ciconi. Il libri si complete cul corpus des poesiis di Gallerio, cuntun inventari, une bibliografie e une tabele dai titui e dai cjâf di viers. Lavôr penç, chel di Zanello, che i permet al letor di capî ben ce che al lei, di valutâ la lenghe dal autôr, di incuadrâle di un pont di viste storic e ancje di valutâ se al fâs falopis. Intun ciert sens, ogni opare di ogni autôr e varès di jessi sometude a une analisi cussì precise.
No che Gallerio al sedi un gran poete, come che a àn vût scrit di leterature furlane: Costantini, Fruch, Chiurlo, D’Aronco. Anzit: la sô lenghe e je plene di talianisims (ministero, eccolo, pres il trono di Dio, geranio, regno, manto, ministros…), di frasis che di furlan a àn dome la patine. No je nancje vivarose,
fûr che un par di voltis:
“l’ha tant da fa cun San Pieri come
i gnespui cull’ue”
“Altris a ricognossin par lor capo Calvin, il qual al discend dai Apuestui come che jo o discend dall’Imperator di Prussie”.
Citazions dulà che si olmarà ancje la tipiche costruzion taliane traviestude di furlan.
Se po si met a volê confrontâsi cul francês (lu fâs cuant che al fevele des rosis…) al sbalie i acents, al cjape feminins par masculins e v.i.
Nancje intes predicjis pre Tite nol è cuissà ce. Lis trê che si puedin lei inte vore di Zanello (dutis trê par furlan cence la traduzion taliane che invezit a àn lis poesiis) a son confutazions dal protestantesim di nivel une vore bas: autoreferenzialitât che i va dongje a la tautologjie. Sicu che cuant che al rive a dimostrâ che la glesie protestantiche no je… catoliche. Ancjemò plui discutibile, mi somee la idee di cjapâ tant che argoment a favôr une frase che al varès dit Theodor de Bèze (un teolic protestant francês):
“il protestantesim al è bon par vivi, ma par murî al è mior il Cattolicismo”: no mi somee une grande publicitât.
Cence nuie gjavâi a la impuartance de ricercje di Gabriele Zanello, al va dit che, par fortune, la leterature furlane e à alc di miôr di podê mostrâ…
Laurin Zuan Nardin

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +