Sfuei Mensîl Furlan Indipendent
Archivi de Patrie

ATUALITÂT. S.O.S. aghe a Paulâr?

............

Paulâr, di cualchi an in ca al è sot cul probleme de aghe. No che nol sedi “aur blanc” te biele Val dal  Incjaroi, anzit. Des sôs monts e ven jù aghe frescje e buine, tante che si ‘nd vûl; al è sot tiere, tai centris abitâts des frazions altis e ancje in part tal cjaf lûc, che al è alc di rusinît: lis conduturis dal acuedot, di fat, aromai vecjonis, a son di cambiâ. I discomuts par un servizi primari come chest no son mancjâts: di persone, lu vin constatât te ultime manifestazion turistiche “Mistîrs 2009”, cuant che dal rubinet di une abitazion di Vile di Mieç e jessive aghe maron. Si à di dî che il câs si è dal moment trasformât in polemiche, forsit par fins eletorâi, furnint dispès une vision stuarte de  situazion. La aministrazion comunâl, rignuvide cuasi cuatri agns fa, e à cjapât di pet il probleme, cirint di sveltî i timps par une soluzion otimâl e stabile. Il vice sindic dal paîs Isaia Dereani: “Ancje se te precarietât – al dîs –, ma par capî  dal dut il probleme si à di fâ un pas indaûr. Lis insistencis dai aministradôrs comunâi cul Stât e cu la Regjon par vê une juste cuvierzidure finanziarie e par podê intervignî, a son stadis acetadis za vot agns fa, cul stanziament di cinc miliarts des vecjis liris e cuntun miliart subite spindût pe emergjence di chê volte. Ma la some plui gruesse (doi milions di euros) e je restade ferme, no doprade – al spieghe Dereani – e dome tal  2006 la aministrazion atuâl e je rivade a meti lis mans su chescj fonts e a tacâ l’iter necessari par che si puedin doprâ. Po dopo, tal 2008, e je subentrade la leç Galli e la L.R. 13 dal 2005 che e imponeve di dâ in man a un gjestôr esterni la conduzion dai acuedots, insieme ai finanziaments a pene contabilizâts. Dutune cun Carniacque, o vin metût jù un plan tecnic e di intervent eficaç, doprant ducj i fonts che a jerin stâts concedûts al  nestri comun. Si larà duncje – al siere il vice sindic – a sostituî cualchi trat di conduture ruvinade tes frazions, Vile di Mieç la prime; si viodarà di rindi eficiente la risultive di Prabon a Ravinis e di meti in sigurece la aree de captazion, che cumò e je a cîl aviert, te localitât di Rufosc. In fin, si larà indenant cul studi pe realizazion di une captazion intune risultive dongje Pecol di Cjaule, che e somee une vore pure e bondante. Cheste soluzion e permetarà di risolvi in maniere definitive il probleme de provision idriche.
DINO TEMIL

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +