Sfuei Mensîl Furlan Indipendent
Archivi de Patrie

La sfide a cinc cerclis di Mara Navarria

Walter Tomada
Medaie di bronç a scuadre spade. Rossella Fiamingo, Federica Isola, Mara Navarria e Alberta Santuccio
Medaie di bronç di spade a scuadre. Rossella Fiamingo, Federica Isola, Mara Navarria e Alberta Santuccio

Ai Zûcs Olimpics di Tokyo
la campionesse furlane e spere di cjatâ il sucès
a coronament di une cariere di gale

Ai 23 di Lui a tacaran a Tokyo i Zûcs Olimpics, rimandâts di un an par vie de pandemie. La edizion numar 32 de ete moderne de plui grande competizion sportive dal mont e viodarà concori ancje un piçul trop di atletis furlanis. Dongje des garis di Chiara Cainero, che za e à vint l’aur a Pechin tal 2008 e l’arint a Rio 2016 tal tîr a svol (specialitât skeet), i voi de int di chenti a cjalaran cun grande partecipazion ancje lis sfidis di scherme, dulà che a saran dôs lis furlanis a rapresentâ i colôrs de Italie: Michela Battiston inte scuadre di sable e Mara Navarria, numar 6 intal “ranking” mondiâl, intal concors individuâl e a scuadris di spade. Propit in Asie, Mara è a za vint tal 2018 i mondiâi a Wuxi, in Cine: e prin de partence i vin agrât di vê contât ae “Patrie” lis sôs sensazions e i siei obietîfs.

Mara Navarria
Mara Navarria

__
Mara, tu sês aromai usade a competi in ogni bande dal mont. Ma ce isal alore di diferent in chest apontament olimpic?
Prin di dut no soi mai stade in Gjapon… e cheste Olimpiade si è fate spietâ un an di plui par vie dal Covid. In chest an o ai podût preparâle tornant a alenâmi in Friûl, a cjase mê. E ancje se par tant timp la atmosfere no je stade chê normâl, cumò la emozion e je fuarte, soredut dopo lis ultimis garis dai campionâts talians.
__
I Zûcs Olimpics a varessin vût di davuelzisi l’an passât. Par te, pe tô personâl cundizion, cemût ise cambiade la tô maniere di vivi e di alenâti in chest periodi?
La pandemie e à savoltât i miei plans di atlete numar 6 dal mont, la prime elementâr di gno fi Samuele e i plans di dute la nestre famee. Però, cun dut ce che al è stât, o ai podût passâ tant timp cun mê mari e gno pari, e cui voi di mari e di femine adulte ju cjali in maniere divierse di cuant che o jeri zovine e o soi partide par tacâ la mê ativitât di atlete. O vin stralozât e cumò o vîf a Cjarlins. E o ai di ringraciâ l’Esercit (Mara e fâs part dal Centri Sportîf dal Esercit, ndr) par vêmi dât supuart ancje in chest moment di cambiament.
__
Ce ti spietistu di chest apontament olimpic? Cuâi sono i obietîfs realistics che tu e la scuadre o pontais a otignî? E i vues plui dûrs? Cualis sono lis aversariis che tu rispietis di plui?
Lis mês sperancis a son di rivâ plui in alt pussibil, sedi individualmentri che cu la scuadre. I tignarès a otignî chel obietîf che al sarès il coronament di agns di sudôr e di fadie, di une vite di sacrificis che dut câs par me e je la plui biele e gratificante. O darai dut! Lis aversariis a son cetantis e no si pues trascurâ nissun. Al sarès stât plui facil rispuindi l’an passât prin che la pandemie e alteràs la ande normâl des competizions ma i pericui a vegnin dai Stâts Unîts, de Polonie, e ancje lis russis che par vie dal doping no si presentaran sot de lôr bandiere. La Cine e la Coree a son par gno cont lis aversariis forsit plui temibilis ma o speri di vê avonde esperience par gjestî di un pont di viste tatic e tecnic i assalts.
__
Cui saraial cun te inte spedizion a Tokyo? Dome i tecnics? La tô famee? Sarêso a distance? I tiei tifôs si stano organizant par fâti vê supuart?
Purtrop nissun, a part i tecnics, al podarà jessi presint. E sarà une Olimpiade strane di chê bande, cence nancje la pussibilitât di sfilâ inte cerimonie di scree de manifestazion. Mi displâs cetant par gno fi e pal gno om che a varessin volût vignî, ma o sai che sot de mê pedane a saran idealmentri ancje lôr cun ducj chei che za cumò mi scrivin e mi pandin il lôr grant afiet.
__
In Friûl tu sês une des sportivis plui preseadis pai tiei sucès e pal to grant ecuilibri, ma ancje parcè che tu âs simpri mostrât cun braùre il leam cu la tô tiere, deventant un pôc une sô ambassadore. La tô rubriche social “Joibe a cjase mê” e mostre a dute Italie lis sôs peculiaritâts. Cemût ti ise vignude cheste idee e ce acet aie?
E je nassude par zûc cuant che o jerin in “zone zale”: intai moments di polse tra i alenaments, cu la me famee o ai tornât a scuvierzi tancj biei puescj dal nestri Friûl. E stant che di simpri mi plâs fâ fotografiis, par chest mi soi impensade che al sarès stât biel mostrâ chescj lûcs cu lis imagjinis e ancje cun piçui videos di introduzion a pro di chei che no ju cognossin. Ator pe Italie pôcs a cognossevin Cjarlins e par chest o ai pensât di contâ ae int taliane e foreste che no je a stâ culì i lûcs, lis  tradizions e lis robis plui buinis e bielis de nestre tiere. Dut câs, a son tancj chei che mi scrivin che a vignaran in feriis a viodi dal vîf cheste tiere tant siore di storie e di biei paisaçs: e o ai scuviert che ancje une vore di furlans no san ce maraveis che a àn su la puarte di cjase…

.
.

__
Isal alc di “tipichementri furlan” tal to mût di jessi atlete e di tirâ di scherme, tai valôrs e te impostazion che tu âs simpri vût?
Al è facil dî che i furlans no si rindin mai, no molin, e soredut no si lassin pleâ des dificoltâts, ma se a colin a tornin in pîts a colp. Chest a nivel di valôrs. Ma ancje a nivel tecnic, mi somee di jessi aromai une atlete complete: di zovine o levi al atac, cumò o ai miorât la difese e il cuintriatac. O soi contente di vê fat tesaur intal gno percors di evoluzion di un caratar propri dai furlans, che al è chel di cjatâ ae svelte lis soluzions ai problemis. La scherme e je un sport là che tu âs di rivâ prin de aversarie a capî ce che al è miôr fâ, vualmâ i siei ponts debii e jessi buine di sielzi il moment just par colpî. O sai meti distance e ancje fâ pôre a chê che mi ven cuintri, se al covente: ma o pensi ancje a judâ chei plui zovins che a àn voie di imparâ. No mi tiri mai indaûr cun nissun, anzit: se tirâ doi colps cun me al sburte cui che al à sperance di miorâsi a meti plui snait e fuarce inte sô azion, jo o soi simpri pronte.
◆ Par chest, dopo des Olimpiadis, Mara e sarà di gnûf protagoniste a Lignan di un “Camp”, la World Champions Academy, rivât aromai ae cuinte edizion, che dai 16 ai 21 di Avost al clamarà dongje zovins schermidôrs al Efa Village par un percors di formazion. La sperance di dute la “Patrie” e je che a chel campus si presenti cuntune medaie gnove: ma in ogni câs e reste un model par ducj chei che a fasin sport in maniere sane e sclete.  ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +