Si siere cun chest numar la schirie di intervistis che il nestri gjornâl al à puartât indevant di cualchi mês in ca par capî miôr ce che al podarès capitâ tal mont de sanitât dal Friûl-Vignesie Julie, soredut dopo de jessude dal Libri vert regjonâl. Dopo vê dade la peraule a esperts che dì par dì a stan daûr a ce che al capite tal mont de sanitât di chenti, al è rivât il moment di sintî in prime persone Vladimir Kosic, che di pôc plui di un an in ca al è assessôr ae Salût e ae Protezion sociâl de Zonte regjonâl, volût cun fuarce te sô scuadre dal governadôr Renzo Tondo.
Assessôr Kosic: cemût isal nassût il progjet dal Libri vert che al à par titul «La vite sane te societât responsabile»?
Stant che o vin di prontâ in curt il Plan sociosanitari 2010-2012, la nestre zonte e à volût pensâ daurman a cemût che e sarà la sanitât te nestre regjon no dome tai prossims trê agns ma ben intun periodi di timp une vore plui lunc. Par chest, za tal Setembar 2008, o vin individuât i principis sanitaris che nus parin plui impuartants. Po dopo, viodût che lis cuistions no mancjavin, o vin pensât di meti jù un Libri vert, imprest che o vin calcolât une vore util par tirâ dongje i operadôrs dal setôr de sanitât, ma no dome.
Su lis 35 pagjinis dal document si cjatin dal sigûr intenzions validis: si riscjial di no vê nuie in man dopo tant semenât?
Sigûr di no. Tiradis dongje dutis lis ideis e lis opinions, o sin aromai ae fin de opare e di chi a pôc o presentarìn il Plan sociosanitari. Cence i sugjeriments e lis propuestis che a son rivadis tai mês passâts al sarès jessût un document funzionâl, mintri che la consultazion vierte a ducj che o vin decidût di fâ i à dât une anime a chest Libri vert. Par la cuâl o podarìn rispuindi a dôs esigjencis: chê de salût e de assistence pai nestris citadins e chê de motivazion dal nestri personâl sanitari, in chescj ultins agns une vore malapaiât par vie de masse burocrazie.
Il Libri vert al è insiorât di cetancj dâts e cifris: cuâl isal il stât di salût de sanitât in regjon?
Ancje di resint il Censis al à tornât a ribati ce che za o savevin di un pieç, ven a stâi che il servizi sanitari regjonâl al è un dai miôr in Italie. Chest al conferme ce che al veve dit ancje un an indaûr il Libri vert dal ministri Sacconi. Il document che o vin prontât, e che al à vût un bon acet di bande dal mont sanitari locâl, nus à pandût che la situazion e je simpri une vore buine ma che si pues fâ ancjemò miôr, puartant indevant chês politichis sanitariis validis che a àn simpri caraterizât la gjestion de salût in regjon, di là dai mudaments di maiorance dal guvier locâl.
La rêt ospedaliere regjonâl, cun 18 presidis publics e 5 privâts par 5300 liets in dut, in dì di vuê ise in discussion?
No si trate di meti in discussion i piçui presidis ma ben di frontâ la cuistion in maniere divierse. Intune regjon piçule come la nestre no crôt che si podin mantignî 23 presidis bogns di frontâ cualsisei probleme in cualsisei moment: bisugne vê il coragjo di tacâ une riforme che e ledi te direzion di razionalizâ ce che al è, dome par rinfuartî il bon che za o vin. Chest al puartarà par fuarce a organizâ in maniere divierse la rêt dai ospedâi, concentrant lis curis di malatiis di une cierte gravitât in centris di alte specializazion. Plui che i piçui presidis, a riscjâ di disparî a son soredut i lôr singui reparts che a seguissin pôcs câs vie pal an: nassûts e mantignûts soredut par cuistions di cjampanili, no son plui di difindi. Tal stes timp o vin di rinfuartî i servizis sul teritori, ancje midiant i miedis di famee, che a podaressin jessi i vêrs «regjiscj» de nestre salût.
Magari cussì no, tal Libri vert nol è nissun riferiment al ûs te sanitât regjonâl des lenghis minoritariis feveladis chi di noaltris: no crodial che doprâ il furlan, il sloven o il todesc al podarès svicinâ di plui i malâts al personâl sanitari?
E je vere che tal Libri vert no si ‘nt fevele, dut câs o vin in pîts une riflession su chest aspiet. Par gno cont, si à di valorizâ lis lenghis minoritariis ma ancje chês plui difondudis: chest par vie che chi di nô al è plui facil par un furlan cjatâ un miedi o un infermîr che a sepin doprâ la marilenghe mintri che mi pâr un tic plui complicât par un austriac cjatâ personâl sanitari bon di fevelâ ben par todesc.
ALESSIO POTOCCO
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +
Gnovis / Ae presentazions dal libri “Feminis furlanis fuartis”, cetant public! Graziis
Redazion
Te seste edizion de rasegne “Quando le Donne” curade da la Aministrazion Comunâl di Romans, cu la autore, Walter Tomada, diretôr de “La Patrie dal Friûl”. A Cormons ur daran acet i Amîs da Mont Quarine, cu la autore a son intervignûde Roberta Nunin, professoresse ordenarie di Dirit dal lavôr ae Universitât di Triest, e Carlotta Del Bianco, […] lei di plui +
Rassegne stampe / Articul dal Messaggero Veneto dai 15-3-2024 su la presentazion dal nestri libri “Feminis Furlanis Fuartis” di Erika Adami
RedazionL'EDITORIAL / Preâ par furlan al è onôr e no pecjât
Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +
Gnovis / Acuile sportive furlane
Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +