NO PAR FURLAN, MA BOGNS. Xavi Sarrià, musiche e peraulis “cu la sperance tra i dincj”

Xavi Sarrià, Amb l’esperança entre les dents, Propaganda pel Fet, 2017
Cu la sperance tra i dincj e cu la musiche e lis peraulis che a tocjin lis orelis, il cûr e il cerviel. Dopo tancj agns cu la band dai Obrint Pas, il cjantant e ghitarist Xavi Sarrià al à inviât za di un pôc di timp une cariere tant che solist, che e va in paralêl cun chê di scritôr e di autôr di contis.
Juste te Sierade dal 2017 cheste ativitât si à concretizade cu la realizazion di “Amb l’esperança entre les dents”, il so prin album a so non.
E je une racuelte di tredis cjançons là che si pues preseâ in chel istès tescj di sostance, fondis rock, folk e reggae e melodiis semplicis e diretis.
Pai argoments frontâts e pal implant musicâl si rive a cognossi cun facilitât i leams jenfri chest repertori e chel de sô band di divignince, là che par sigûr la personalitât di Xarrià e veve un rûl fondamentâl.
Un biel esempli di cjançon di autôr moderne e in evoluzion. ❚
Marco Stolfo