Sfuei Mensîl Furlan Indipendent
Archivi de Patrie

Armoniis di ponts in moviments

Erika Adami

Cuant che tu lis cjalis, chês tocjadis di colôr cussì slungjât sul plexiglas, ti emozionin. La ripetizion di chei ponts, che a somein scuasi casuâi, te lôr naturalece, e burìs fûr composizions rafinadis, che a nassin di une cure e di une progjetualitât une vore fuartis. La imagjine, ogni volte che tu cjalis lis voris di Alessandro Zorzi, no je mai compagne, e à dentri lis lidrîs dal cambiament, che ti fevele, miôr di cualsisei altre robe, dal so autôr, dal so nomadisim. No scuint ni irecuietece, ni un malstâ, ma la dibisugne di cirî, di cognossi, di capî, tant fuarte che no à pôre dai sacrificis, des rinunziis.
Alessandro, furlan di 36 agns, al à scomençât il so viaç cuant che al jere student de Academie di bielis arts. In chê volte al sielzè di lâ vie, in Ingletiere, scjampant di Vignesie, par no restâ presonîr di nissun insegnament, par cressi su lis sôs gjambis. Al jere il 1997. Là sù, a Southampton, sul mâr, te fumate, al cjatà ce che al cirive: la lûs. In font, però, chê lûs le cognosseve, le veve za viodude. A jerin i voi che le cjalavin a jessi diferents. «In Ingletiere – al conte – o ai cjatât la lûs dal unvier furlan». Une scuvierte che i à costât fature e che lu à cambiât, tant che om e artist. Alessandro al à tacât a lavorâ cul blanc su la cjarte di lustri, po, chê cjarte, le à montade suntun carton piturât di scûr e, daspò, lu à inscjatolât, scuasi a protezilu, tune teche di plexiglas. Fin a gjavâle, a metile in bande. Al jere rivât il moment di svolâ fûr des scjaipulis. Ve alore che il plan trasparent nol à plui di contignî, ma di fâ di supuart. Su chê superficie, russade tra nûi di polvar, si poiaran biel planc armoniis di ponts in moviment, simpri diviers, stratificazions licuidis che si fasin lûs, clâr e scûr, che a cjalin ae nature. E chi al ven fûr il leam cul Friûl, la tiere di origjine, lassade sì, ma mai dismenteade.
La art di Zorzi no à nuie a ce fâ cu la tradizion figurative furlane, ma e je peade a une tiere, ae sô int, ai siei «valôrs». «O torni dispès in Friûl, dulà che a son i miei afiets, ancje se o vîf, par lavôr, tra Milan e Bergamo». La famee, il paisaç furlan, la memorie des lidrîs contadinis, l’amôr pes piçulis robis, «chês che a fasin la vite plui vere», a vivin tes voris dal artist. «O soi orgoiôs di jessi furlan», al marche. Tai siei ditics lis parts dividudis a àn sens dome tal lôr jessi cubie. E chi si pant dute la fuarce di une educazion implantade su la acetazion dal diviers, su la tolerance, su la impuartance dal confront, de relazion, valôrs instilâts a scuele, al «Sello» di Udin, leâts a fîl dopli cu la storie di une tiere di crosere, fondade su la diviersitât.
E ta cheste tiere Alessandro al à voie di tornâ, plui indevant, «par trasmeti a chei altris la mê esperience, se no al dîs – al sarès come impuarîsi. Al è chest il sens dal viaç, dal gno viaç».
–––––––––––––––––––––––––––––––––––––––––––––––––––––––
CE FÂ
Ve chi dôs bielis iniziativis che a vuelin valorizâ i zovins artiscj che a lavorin in Friûl. Te suaze dal progjet Spazi Fvg dal Centri di art contemporanie Vile Manin, fin ai 16 di Jugn lis stradis di Codroip e dulintor a daran acet aes imagjinis, riprodusudis su manifescj publicitaris, dai 20 artiscj menzonâts al concors «ManinFesto Fotografie». Un mût origjinâl par jessi dai confins de vile e vierzisi al teritori, ancje a cui che nol è usât o passionât di art.
Di marcâ la gnove iniziative dal Spac, il Spazi public di art contemporanie di Buri, che, ai 7 di Jugn, al à screât «Anteprime Fvg»: rassegne regjonâl par 59 artiscj residents in regjon che no àn mai esponût, invidâts di 20 critics a presentâ lis lôr voris tai locâi de vile di Toppo Florio e tal zardin. L’obietîf? Chel di promovi produzions, ricercje e inovazion te suaze des arts visivis, disleadis dal fatôr marcjât. Ai 19 di Lui e ai 30 di Avost la rassegne, che e larà indenant fin ai 27 di Setembar il vinars e la sabide des 8 aes 11 di sere, si rinfrescjarà par vie che i artiscj a cambiaran lis oparis in mostre. La jentrade e je libare. Informazions al numar 348.5625948.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +