Sfuei Mensîl Furlan Indipendent
Archivi de Patrie

Une zovine orchestre alpine

............

Plui di 40 musiciscj, dai 18 ai 25 agns, tal gnûf progjet de Fondazion Bon di Colugne

E je nassude in Friûl une gnove orchestre, ben divierse des formazions come che o sin usâts a intindi. Si clame “Orchestra Giovanile Alpina”, un progjet ideât e puartât indenant de Fondazion Luigi Bon di Colugne inte suaze dal bant di concors che e à vinçût, promovût de Regjon Friûl-Vignesie Julie tal cuadri di “Tumieç Citât Alpine”.
E je une orchestre che e conte plui di cuarante zovins musiciscj che a vegnin dal Friûl, dal Venit, de Val di Aoste, de Lombardie, de Austrie e de Slovenie. Zovins sì, ma no inesperts. Parcè che la plui part di lôr e je bielzà diplomade tal lôr strument, altris a stan fasint masterclass e cors specialistics in istituzions musicâls europeanis impuartantis, e par jentrâ a fâ part de “Orchestra Giovanile Alpina” a àn vût di passâ audizions par nuie facilis.
Cussì, dopo diviersis provis e selezions, la scuadre e je stade ben definide e al so interni a son stadis costituidis ancje siet formazions di musiche di cjamare par doi, trê, cuatri strumentiscj. Un percors formatîf cetant impuartant che al permet a chescj zovins mestris di fâ esperience, sedi intune orchestre sinfoniche, sedi in formazions plui ristretis. Il dut curât dal famôs clarinetist furlan Claudio Mansutti, che al è ancje il diretôr artistic de Fondazion Luigi Bon e di une scuadre di professioniscj de nestre regjon tant che il diretôr di orchestre Paolo Paroni, il sopran Anna Maria Dell’Oste e la pianiste Federica Repini.
Grancj e adolessents insiemi, par une esperience educative e artistiche che e à vût cetancj preseaments in ocasion dai doi concierts inaugurâi che a son stâts fats ai prins di Fevrâr a Pagnà e a Mueç. Un programe musicâl cence dubis impegnatîf – incentrât su doi compositôrs definîts “parincj”, Mendelssohn e Haydn – cetant ben eseguît, par une grande formazion, compagnade dal Côr dal Friûl-Vignesie Julie, cu la direzion di Paroni e ospits i soliscj Anna Maria Dell’Oste e il gjaponês naturalizât furlan Hao Wang. Une des particolaritâts plui interessantis di cheste zovine orchestre e je che i siei elements si inviin in cheste maniere a un percors professionalizant. No dome pal fat che a àn mût di studiâ i plui varis repertoris, cun int di nomee internazionâl, ma ancje e soredut parcè che lis lôr performances a vegnin paiadis, come ancje lis trasfiertis e i concierts che a àn bielzà in programe par cheste Primevere e Istât. Une orchestre di stâi daûr.
Alessio Screm

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +