Sfuei Mensîl Furlan Indipendent
Archivi de Patrie

Lis cundizions pre juridichis de specialitât

............


Une cunvigne resinte a Trent, in ocasion dal inovâl dal Pat De Gasperi-Gruber (5 di Setembar dal 1946) – fonde dal prin statût di autonomie dal Trentin-Sud Tirôle à ben piturât lis carateristichis che a supuartin e a motivin cundizions di specialitâts regjonâls diferentis. Autonomiis regjonâls fuartis e finalizadis come chês dal Nord Irlande e de Scozie, o chês di Catalogne e di Euskadi te penisule iberiche, chês dai lander austriacs o todescs o chês dal Trentin e Sud Tirôl, si pense che a funzionin ben in prevalence par cuistions di assets organizatîf dissiplinâts di normis juridichis che a configurin istituzions di guvier e relativis competencis.

**Altris impostazions invezit a viodin te cuantitât di risorsis economichis cjapadis sù tal teritori e intai trasferiments finanziaris dal guvier centrâl la suste par une eficiente e eficace aministrazion regjonâl diferenziade. Chest ultin al è ancje il pretest che i tarizadôrs des autonomiis a doprin par dî che i statûts speciâi no àn plui motîf di esisti e a son dome un privileç.

**Dut câs, ni il dât juridic ni chel economic a esprimin fin insom la esperience positive di une autonomie regjonâl madure, responsabile e eficace come chês che o vin prime riclamât.

**Tal centri di chês esperiencis bisugne simpri meti ancje la presince di cundizions pre juridichis: lidrîs storichis, vere identitât coletive, capitâl sociâl comun, coesion culturâl, struture economiche vualive, solidarietât comunitarie, determinazions politichis.

**Chestis cuistions a son une vore determinantis e a cualifichin lis fondis stessis de vocazion al esercizi de autonomie regjonâl, anzit o disarès che a son la cause, e no l’efiet, de necessitât di istituzions juridichis normativis diferentis par chês comunitâts.

**A son il puartât ultin de culture diferente dai teritoris e des comunitâts e duncje a fasin part de culture de autonomie, che e reste la reson plui vere di un esercizi vitâl des esperiencis di guvier regjonâl. A son ancje il vêr motîf che al esprim il parcè che lis stessis risorsis e cundizions metudis a disposizion dal stât pe ricostruzion post taramot, in Friûl a àn funzionât e di altris bandis no.

**Che no stedi duncje la Regjon F-VJ a pierdi lis coordenadis culturâls, a partî des diferentis lenghis presintis in chest cjantonut di Europe. A son la spie di une complessitât culturâl e duncje di une articolazion etniche particolâr che e domande une atitudin gjestionâl speciâl.

✒ Claudio Violino

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +