SPECIÂL – Furlan a scuele: come (e plui di) prime

Furlan a scuele: un dai argoments che a sticin di plui lis boris cuant che si fevele di tutele de marilenghe. Par solit e je une cuestion cognossude pôc e mâl, dulà che ducj si sintin mestris; no si contin i coments su lis strategjiis didatichis plui justis, sul numar di oris just par setemane, sui pro e sui cuintri di un insegnament plurilengâl.
Daspò de sentence de Cort costituzionâl, la situazion e je ancjemò mancul clare: al pâr che la semplice abrogazion di vot comis e vei scancelât intun colp sôl dute la politiche linguistiche. E je vere, part de L.R. 29/07 no podarà jessi metude in vore, ma a restin dutis lis disposizions de L.R. 15/96 e, soredut, de 482/99 che in materie di scuele e fevele clâr: te scuele de infanzie si previôt «dongje dal ûs de lenghe taliane, ancje l’ûs de lenghe de minorance tal davuelzi lis ativitâts educativis», e tes scuelis elementârs e secondariis di prin grât «l’ûs de lenghe de minorance tant che strument di insegnament», ve a stâi un ûs veicolâr de lenghe. E alore, ducj chei che a gjondin pe sentence de Cort costituzionâl, a puedin cuietâsi: il furlan de scuele no lu gjave nissun.
UNE DOMANDE FUARTE E COSTANTE_Cun di plui, la Regjon e finanzie ogni an, in gracie de L.R. 3/02, progjets didatics in lenghe di minorance che a durin minim 40 oris. Baste cjalâ cetantis scuelis che a àn presentât progjets tal an scolastic 2008/09 par rindisi cont che la domande e je ancjemò alte. Suntun totâl di cirche 200 scuelis dal oblic in regjon, cent fra publichis e paritariis a àn presentât domande di contribût daûr di cheste leç. An daspò an, lis scuelis che a presentin domande a son simpri chês: chest al vûl dî che e je une costance te programazion, e che la lenghe furlane e je aromai jentrade te ufierte formative. Chestis scuelis a àn di insegnâ in marilenghe su la fonde di progjets «una tantum», dome parcè che la leç no ur permet une programazion continue.
SPAZIS VIERTS_ Se daûr de sentence de Cort costituzionâl la ore di furlan e va cuintri de autonomie de scuele, i spazis par podê proponi l’insegnament e l’aprendiment de lenghe furlane a restin. La filosofie di fonde de leç 59/97 e je chê di svicinâ lis istituzions, che a cjapavin diretivis di un ent centrâl dispès lontan dal contest li che la scuele si moveve, aes realtâts locâls. L’imprest al ven dât par mieç de libertât organizative e didatiche, o ben chê di disleâsi dal concet di ore di lezion. La sielte de programazion, des metodologjiis e de organizazion dal insegnaments e je vierte a une vore di pussibilitâts. Tal regolament de leç in cuestion (D.P.R. 275/1999) si clarìs e si insist plui voltis sul fat che il Plan de ufierte formative, e ancje lis propuestis de istituzion scolastiche, a àn di tignî cont dal contest culturâl, sociâl e economic de realtât locâl. Une impostazion che si insuaze perfetementri tai orientaments europeans li che si à di partî de dimension locâl par slargjâsi in chê plui vaste de Europe. Chest si tradûs in concret te cuote dal 20% dai curricula che e ven lassade ae volontât de scuele, e che la scuele e pues decidi di «doprâ» pal insegnament in marilenghe.
La formazion dal arlêf duncje e à di insedâsi cul mont dulintor. Se in chest mont un dai elements – no dome de culture ma ancje de comunicazion – al è la lenghe furlane, dal sigûr si pues proponile. E miôr ancjemò se il furlan al è doprât come lenghe veicolâr: cjapâ dentri plui dissiplinis e je une altre oportunitât ufierte de leç su la autonomie scolastiche.
Il decret n. 223 dal 2002 daspò, al proviôt che la Regjon, te sô funzion di coordenament dai compits dâts aes scuelis, e regolamenti l’ûs de lenghe di minorance e il so insegnament te scuele.
PROGRAMAZION ORGANICHE_Rosalba Perini, referente pe lenghe furlane dal Ufici scolastic regjonâl, e marche che nuie al è cambiât daspò de sentence de Cort costituzionâl: si podaran simpri fâ i progjets anuâi in marilenghe, ma si à di pontâ a fâ jentrâ l’insegnament de lenghe furlane tal curriculum scolastic, intun sisteme di insegnament plurilengâl. I ponts de L.R. 29/07 ancjemò in vore a son fondamentâi par rivâ a chest fin: rindi plui organiche la programazion didatiche al è fondamentâl se si vûl che l’insegnament de marilenghe al fasi un pas indevant .
Par Laurin Zuan Nardin, diretôr didatic a Aquilee, la sentence no cambiarà la linie seguide tes sôs scuelis: si continuarà a presentâ domande di contribût pai progjets anuâi. Miôr al sarès però vê une leç che e permetès di programâ la ufierte didatiche par plui agns, magari par ciclis scolastics. La ufierte formative e sarès plui organiche e ancje il lavôr dai mestris al sarès plui facil. Nardin al marche ancje lis tantis dificoltâts che a son tal mont de scuele, soredut la mancjance di ricognossiment dai percors formatîfs fat dai mestris, e il precariât di tancj di lôr, che nol facilite la programazion plurienâl.
La volontât di lâ indevant e je, e i numars des adesions ai progjets in marilenghe e fevelin a clâr: la scuele e à di «fevelâ» furlan. Metint dongje lis oris dai progjets finanziâts de L. 482/99, cun chês de L.R. 3/02, e zontantlis a chês che daûr de autonomie scolastiche a puedin jessi risiervadis a argoments di culture locâl, si rivarès adiriture a insegnâ in marilenghe par dut l’an scolastic, e ducj a varessin di stâ in pâs.
Federica Angeli