Tal mês di Lui e je stade screade, te Cjase dal Popul di Prât, la mostre fotografiche di Gigliola Dipiazza di Tualiis ‘La mont – il mont des bergjos’, che in Setembar e vierzarà il so barcon su la mont a Denemonç.
‘E je une mostre che nus rimande aes nestris lidrîs’, e à dit la assessore ae culture Luigina Agostinis, ‘i scats fotografics di Gigliola nus ripuartin aes nestris tradizions, ae nestre comunitât, a scuvierzi i vecjos rituâi dal lavôr intes malghis. No je une mostre nostalgjiche ma cuasi un invît a puartâ indevant cheste tradizion’.
‘O vin zirât dutis lis “bergjos” (caseris, NdR) de Cjargne!’, e conte Novella Del Fabbro. ‘Un che al va fûr de Cjargne come Gigliola (a 18 agns e va in France a studiâ piture, plui tart a Milan – vuê e lavore al Corriere della Sera) al riscuvierç la gjenuinitât de sô int e dai siei prodots, e di fat cul so scat fotografic o viodìn il risultât. Al è stât biel zirâ chestis monts. O vin viodût il vecjo stagjonât ma ancje int zovine che e crôt in cheste tiere’. E pensâ che la storie des “bergjos” e je antigone: di une ricercje fate di Novella ‘Il patriarcjât di Aquilee al concedeve ae int di alte mont, tor i prins dal an, 1.000 boscs e passons e l’afit al vignive paiât in nature (formadi, spongje e scuete). E cussì, a son nassudis lis “bergjos” fin a 2.000 metris di cuote, puartadis indevant di privâts, fatis par solit indulà che e jere aghe, al ripâr des lavinis cuntune tecniche particolâr te costruzion: il tet in scjandule, la foghere cu la musse di fûr, a difese la piramide di claps anti lavine, il “tabio” in len par disgotâ il formadi (cumò la normative CEE e vûl dut in açâl e dut piastrelât; un fedâr inte casere al jere che al barufave cu la spongje parcè che tal plan in açâl il prodot al sbrisse e al à dit: ‘no àn capît chei de CEE che al baste un cit di sîr bolint par disinfetâ’). Ai prins dal 1100 a jerin cirche 169 “bergjos” in Cjargne; cumò une cuarantine che a partissin dai 1.500 di altece fintremai a cuasi 2.000 metris.’
Cu lis sôs fotografiis, Gigliola nus fâs viazâ jenfri chestis realtâts un pôc dismenteadis ma cun tancj agns di storie. No je di tantis peraulis e e lasse che i siei scats a fevelin par jê. Cussì, cjalant lis sôs fotos, ognidun al pues scuvierzi e puartâ a cjase alc: une espression, un panorame, un contest, un cjanton, une muse, un lûc, une lûs, une ombre, une ridade, un moment di ligrie, une stagjon, un prodot dal mont des bergjos cjargnelis e no dome! E jenfri chestis fotografiis, si podarà cjatâ ancje un marochin che al jude un cjargnel a fâ çuç… Ancje chest al è il mont des “bergjos” di vuê.
✒ Marta Vezzi
