Siart
Siart von Beilstein, bavarês (?; 12 di Avost dal 1077), al met a disposizion dal imperadôr Indrì IV la sô scorte personâl par che al ledi a Canossa, ae presince di Gregori VII e de badesse Matilde, par domandâ perdon e par fâsi gjavâ la scomuniche. Cun cheste fuarte intuizion politiche, il patriarcje al podè gjoldi de ricognossince dal imperadôr, che si trasformarà inte istituzion de Patrie dal Friûl, cul famôs document firmât a Pavie ai 3 di Avrîl dal 1077, date di nassite de Patrie.
Popon
Wolfgang von Treffen, cognossût tant che Popon (?; 1045), al fo chel patriarcje che plui di ducj chei altris al rivà a capî la impuartance dal Patriarcjât tant che une presince vivarose e fuarte intal cûr di une Europe multilengâl, fondade inte specialitât di une glesie mari. La muse gnove regalade ae Basiliche, cul so profîl romanic, e evidenzie cheste mission, mostrantsi buine di meti in struc la culture Adriatiche cun chê Slave e cun chê Todescje. Odeât par chest di Vignesie, al murarà presonîr intes sgrifis dal so Leon.
Come che si sa, la Fieste dal Friûl si fâs inte dì che e je nassude la Patrie dal Friûl, une entitât politiche che e meteve adun dut il nestri teritori e che à vût grande impuartance, ancje se la storie taliane no nus al conte. Cheste istituzion e jere comandade di un Patriarcje. O vin domandât a Agnul Floramo cuâi che a son par lui i cuatri Patriarcjis plui impuartants inte storie e parcè. Veju ca…
Bertrant
Nassût in Guascogne tal 1258 e copât a San Zorç de Richinvelde ai 6 di Jugn dal 1350, Bertrant de Saint Geniès al fo un om bon di crodi inte fuarce des ideis fin ae venerande etât de sô muart, a 92 agns, par man di un trop di feudataris vendûts a Vignesie. Al cirì di fondâ un Stât Patriarcjin operant une rivoluzion ideâl che e varès vût di promovi la bielece da la art e la profonditât de cognossince, realizant la universitât a Cividât, zimule di chê di Praghe, che purtrop e je restade dome un sium.
Marquart
Marquart von Randek (Auguste 1296 – Triest 1381) al ven ricuardât tant che il fondadôr di un dai prins parlaments in Europe. In veretât, al fasè cetant di plui: une opare straordenarie di censiment di dutis lis leçs consuetudinariis e statutariis che lis comunitâts de Patrie si jerin dadis a partî da la ete dai Langobarts indenant. Al metè dut in man a une comission di juriscj dai plui brâfs in Europe, produsint chê opare uniche che e passe ae storie cul non di “Constitutiones Patriae Fori Iulii”. ❚
✒ Agnul Floramo
