IL PERSONAÇ STORIC. Giulio Asquin

Giulio Asquini (Udin 1753 – Feagne 1847), prin fi di Fabio, cont di Feagne e promotôr de agriculture moderne in Friûl, al jere stât inviât dal pari intai studis di meteorologjie, par chei timps une novitât assolude. A Udin, là che la famee si jere trasferide intal 1772, intai orts dal palaç di vie Manin che si rimpinavin su pe frate dal cjistiel, al veve costruide une stazion di rilevament, cirint di produsi un cuadri coerent di osservazions obietivis. Cussì, no dome i siei regjistris, tignûts cun precision cuotidiane par nûf agns, a rapresentin une risorse storiografiche puntuâl e precise (al notave ogni fenomen che al rivave a regjistrâ), ma a puedin jessi considerâts, pe utilizazion di struments inovatîfs tant che termometris e barometris, la prime indagjin sientifiche fate sul clime de nestre Regjon. ❚
✒ Agnul Floramo