(L)INT FURLANE. Il zûc di lodui dal risultât eletorâl

✽✽ O varessin di cjalâ cheste tornade eletorâl cun distac, in mancjance di listis autonomistis o inschiriadis sul front identitari: ai eletôrs furlans ur mancjave cualsisedi pont di riferiment. O scugnìn ancje in cheste ocasion ribati cun fuarce che nissun partît, moviment o leghe talians a puedin rapresentâ i interès e lis aspirazions dal nestri popul.
✽✽ Cui che al deleghe i propris bisugns, che al met il so futûr intes mans di chescj siôrs e sioris, al fâs un dopli erôr: nol à a cûr i propris interès e si fide, dispès fasintsi scût de ideologjie, di une classe politiche locâl dal dut dipendente di chê romane.
Mi somein chei tifôs che, armâts di bandieris e di cocardis tricolôrs, a àn jempladis bar e ostariis pai europeans di balon, sgosantsi par une nazionâl che nus aparten dome “in maniere istituzionâl”, scuvierzintsi sfolmenâts patriots dal balon, fale dopo tornâ, magari blestemant, ae realtât dure de vite cuotidiane, segnade des sieltis centralistis simpri plui pesantis.
Il vôt pal sindic de proprie comunitât al scugnarès in dut câs metisi sul limit di cheste situazion parcè che, a ben che cuasi simpri condizionât de presince dai partîts, al rapresente vuê la uniche forme restade di democrazie direte. Chi però e va fate une distinzion tra comuns, escorporant des analisis chei che a son lâts ae balotazion.
✽✽ Intal câs dai elets al prin turni, o notìn une riduzion drastiche, a pet dal precedent confuartant di cinc agns indaûr, des listis che a àn il non – o almancul une part – par furlan. Intal comun di Cjas un Nert e Cas (che e à pierdût) e a Sauris Realizhare: un zûc di peraulis fra talian e sauran.
Un segnâl? O spietìn il neu elets e lis lôr zontis ae prove des Uti, de adesion o mancul ae Assemblee de comunitât linguistiche furlane, al rapuart insume che a volaran creâ cun chês comunitâts che a son daûr a movisi sul canâl identitari.
O rivìn a Pordenon e Triest, cetant significativis sul plan politic regjonâl se apont o resonassin daûr de logjiche dai partîts talians. Cun cheste vision des robis, al è ciert che lis vitoriis di Di Piazza e di Ciriani a spesis di Cosolini e Giust a segnin une sdramassadone pe Serracchiani e ancje par Bolzonello. Politics seris e coerents a varessin di vê za dadis lis dimissions. Ma, se a punîju e je stade propit la paronance di podê dimostrade in chescj timps, figurìnsi se a compiran un mot cussì nobil!
Par nô, autonomiscj simpri plui convints devant dal decjadiment dal stât centralist, ce cambial? Propit nuie.
✽✽ A Triest, inte lote eterne tra grups di interès su lis risorsis statâls, al è stât sostituît dome il gjestôr; a Pordenon, l’as cul Venit si rinfuarce: e nas une linie “maritime” veneziane, targade TS–PN, che di chê ancjemò une volte il Friûl al rapresente la campagne di disfrutâ e di emargjinâ.
Dôs ultimis considerazions. La prime sul pês dai partîts tradizionâi che a mantegnin ancjemò une lôr fuarce: nol sarà facil e nancje automatic, par une gnove formazion autonomiste, il lôr ridimensionament. Il vôt a Tarcint lu dimostre: Walter Tomada al veve dutis lis carateristis par podê jessi elet in alternative, ma la “vecje politiche” e à vude la miôr.
✽✽ La seconde e je forsit chê plui impuartante: a son falîts in maniere misare i referendums pe union dai Comuns. Ancje chi, lis dimissions dal assessôr Panontin a saressin dovudis, viodût il so impegn, ancje finanziari, in chest sens.
Cuant che ai citadins tu ur dâs la pussibilitât di esprimi la proprie volontât a pet des riformis istituzionâls, il risultât al va inte direzion opueste a chê sielte e imponude de zonte  Serracchiani.
Ce fin varessino fatis lis Uti, la riforme sanitarie, il disfasiment des Provinciis se il popul al ves podût dî la sô? ❚
✒ Dree Valcic