Cuant ch’i coli

Cuant ch’i coli
lu fai belbelu**
comi si dovessi
jodi tai voi
i parcè da la colada
i podarès slungjâ li’ mans
par parâ il colp
e no spacâmi il nâs parcjera
invezi stoi fer
i plombi sul teren freit
e distirât lu nasi, lu vuardi da vissin
pi jù di uchì pos zî
doma cuant ch’i murirai
a mi ven sum
la me cjera a mi cjanta una nenia
fin cuant li’ furmiis
a bechin li’ me mans
e a mi disin ch’a
è ora di rialçâsi.
**biel planc
✒ Alvaro Vallar, poete di Cjavàs. Gnove poesie in esclusive par La Patrie dal Friûl in variante “cjavassin”. O ringraciìn Pier Carlo Begotti pe colaborazion.