Il radun a ‘nt fâs trente

Chest an al è il radun numar 30: trente agns di Biker fest international, un dai plui impuartants e innomenâts in Italie e tal rest de Europe. Si fasarà a Lignan dai 19 ai 22 di Mai. L’event si davuelzarà in trê ponts de citât: Terrazza a mare, stadi Teghil, zone dal Luna Park. Fra lis robis di segnalâ: la spetacolâr parada di motos, dilunc lis stradis di Lignan, il sabide sere, cun partence aes 7 di sere dal Luna Park. Li dal stadi, a saran presintis lis plui impuartantis cjasis motociclistichis cun dimostrazions e provis dai gnûfs mieçs. La Harley Davidson e varà un so camion, cun ducj i modei in prove sore nuie. E po: i mototours curâts e proponûts de organizazion par fâ cognossi lis bielecis dal Friûl-VJ; e il XXI US Car reunion, incuintri storic par machinis americanis. Par ultin, une ale di santitât cu la Christian Motorcyclists Associazion: motârs che a distribuiran la Biker Bible. E domenie a organizaran la Biker blessing, benedizion par cui che si metarà in viaç par tornâ a cjase. ❚
(Os.Pun.)