NO SON PERAULIS PAR VECJOS. «Tutorial»

_Mandi nono!
Mandi frute, ce fasistu cun chel bancâl? Âstu di fâ consegnis?
_No, nono: o stoi fasint un taulin pe terace.
E ce ti àno puartât cul bancâl, il len?
_No, o dopri propit il len dal bancâl. A usin cussì, vuê. A jerin ancje al Salon dal Mobil.
Sigûr: par movi i mobii vêrs, però, no par fâ taulins!
_Ma no, nono, ju fasin propit cui bancâi, cussì.
Ma il marangon no vevial un len miôr?
_O soi jo il marangon, nono! Lu fâs jo il taulin. O ai cjalât un tutorial su YouTube.
Intune tutubie? Par fuarce: no tu lu cjatis sigûr intune cjase di sest, un taulin fat cuntun bancâl.
_No une tutubie, nono! Un tutorial su YouTube. Al è un video che al spieghe cemût fâ une robe.
Spieghimi, spieghimi: invezit di fâti insegnâ di un marangon, tu cjalis un video?
_Sì, nono, sul computer. Tu cjatis tutorial cun video o fotos di dut ce che tu âs voie: par gucjâ, par piturâsi lis ongulis, par doprâ i programs dal computer…
Tu cjalis un video sul computer par savê cemût doprâ il computer? Biele cheste! Covential ancje un video par cjalâ i video?
_Sù mo, no sta a coionâmi: o dopri dispès i tutorial, jo. Par fâ di mangjâ, par decorâ lis tortis, par fâ l’ort… Chê altre dì che soi stade a gnocis, o ai cjalât un video pal sbelet e un pe petenadure.
Mancul mâl che o soi cence cjavei, che se mi tocjave cjalâ un tutorial tal computer ancje par petenâmi o jeri freât. Ce striaments.
_Ma i tutorial a son simpri stâts, nono. Dome che une volte no jerin sul computer, ma magari intun libri di istruzions.
Cumò che tu mi fasis pensâ, tô none tancj agns fa e veve cjolt un video di Jane Fonda par fâ gjinastiche e deventâ plui biele.
_Velu, nono: chel li al jere un tutorial in VHS.
Cjale, frute, se il to bancâl al somearà a un taulin come che tô none e someave a Jane Fonda, scoltimi me: ti conven lâ di un marangon. ❚
✒ Bete Di Spere