Timp pe preparazion: 5 minûts • Timp par cuei: 30 minûts
Ingredients par cuatri personis
1 terinute di caulis di Bruxelles netâts e taiâts in cuarts, 2-3 miluçs spelâts e taiâts a fetutis, 2 sedons di asêt di miluçs, 2 sedonutis di vueli di ulive, 1 grimpade di tim taçât, 1 prese di sâl e 1 di pevar neri pestât sul moment.

SI FASIN CUSSÌ
Facilone, si metin ducj i ingredients ben messedâts intune pirofile, e si le met tal for cjalt (180°) fin che i caulis no son deventâts tenars.
Il dolç des pomis e il garp dal asêt a dan frescjece e un savôr insolit, mancul invernâl, ai caulis, esaltât dal profum dal tim.
Plui lizere de version tant cognossude dai caulis gratinâts tal for cun parsore pan gratât e formadi, e va benon tant che contor dongje di un formadi o di un secont no masse elaborât, tant che le classiche fetute di cjar. Perfets cu la cjar di purcit (une bistecute di cope o une brusadule) che si spose ben tant cul savôr invernâl dal cauli che cun chel gust dolcegarp dai miluçs e dal asêt, che al disgrasse la bocje dal gras de cjar.

Margherita Meggy Timeus