Lis origjins – robic e robighe

Robic al jere il diu roman de ruzin de blave, a lui si dedicave il rît che al coventave a limitâ i dams de malatie tal forment. Ae sô femine Robighe invezit si dedicave la fieste pe protezion de semence e de racuelte, o ben lis fiestis Robigaliis. La fieste propiziatorie e colave ai 25 di Avrîl e il rît lu faseve il flamen Quirinalis che al sacrificave a Robic lis vissaris di une cjice rosse e di une piore. Si conte che al è stât Pape Liberi (352-356) a convertî la fieste di paiane in cristiane. Diviersis di chês romanis, o grandis, lis rogazions piçulis a derivin des Galiis, inseridis inte liturgjie romane di Pape Leon III (795-816), che al à decidût di celebrâlis tai trê dîs prin de Sense. Similis a jerin lis Floraliis e lis Ambarvaliis, altris fiestis contadinis dedicadis a mari nature. La seconde e vignive rivolte a Cerere, la divinitât de tiere e de fertilitât.
Si conte che e je stade jê a insegnânus cemût coltâ i cjamps. ❚
✒ A.S.