Pe Patrie 9.000 amîs sul Muselibri

Un biel ricognossiment pe «La Patrie dal Friûl»: intal mês passât o sin rivâts a 9.000 iscrits ae nestre pagjine Facebook. Un imprest che nus permet di seguî di plui la atualitât (ancje se la nestre passion e je la riflession), metisi in contat diret cui letôrs e fâsi cognossi. Come cuant che, a Otubar, publicant un sempliç cartel cui erôrs fats de Ferrero-Nutella, o sin stâts citâts dal Corriere della Sera.
IL SFUEI_Il cûr de nestre testade al reste simpri il sfuei, che al à il compit di tirâ dongje e di fâ ordin in dutis chestis informazions che nus vegnin, stimolâ cun riflessions e fâ servizis gjornalistics che i altris no fasin (nol fos altri par chel voli furlanist che o vin dome nô).
IL SÎT_Po dopo al ven il sît www.lapatriedalfriul.org, che al à funzion di archivi, li che si puedin cjatâ ducj i articui jessûts, a partî dal mês dopo de publicazion. (Si met ancje cualchi anticipazion dal mês in cors, par dâ une cerce).
IL SISTEME_Un sisteme editoriâl, duncje, che si è insiorât tant tai agns in gracie dal sfuarç de redazion, pal plui volontari. Un sisteme che si podarès infuartî e miorâ: lis ideis che o vin a son tantis.
Par fâ chest però o vin bisugne de vuestre man: abonaitsi e fasêt cognossi il nestri gjornâl ai amîs. «Par un Friûl plui furlan»! ❚ ✒ Redazion