Sfuei Mensîl Furlan Indipendent
Archivi de Patrie

IL GRANT LUNARI DAL FRIÛL. Otubar

............

IL SORELI, LA ATMOSFERE, LA NATURE
Dopo vê passât la linie imagjinarie dal ecuinozi de Sierade il soreli al va indevant a sbassâsi dilunc de sô parabule celeste di rive jù, fasint cussì calâ la durade dal dì e cressi chê de gnot. Il soreli al spant i ultins clips e dapardut si intraven il rimplant de sô colade. La nature e marche la sô variazion cromatiche, tant che in chest mês i siei cuadris vegjetâi si pandin come une grande palete di colôrs, prime vivarôs e slusints, po smavîts e flaps in spiete dal so impisuliment. I animâi a emigrin o a cirin lis tanis li che a laran in letarc tal lunc Invier. I paisaçs a son tocjâts des primis brumis; il plan e lis vals a puedin za cuvierzisi di fumatis, sul mâr a soflin buere e tramontane.
VORIS DAL CICLI AGRARI
Si fâs la seconde part de vendeme, di racuelte di pomis e di prodots de tiere, soredut patatis e blave, che a vegnin puartâts a cjase, ingrumâts e in part ancje trasformâts pe lôr conservazion. Grandis voris tai curtîi e tes cjanivis pes operazions delicadis de vinificazion in graciis dal tratament atent des uis, dal control dal zucar dai mosts, de lôr ebolizion e dal colôr e savôr dal prin vin. Si tache cu lis gnovis seminis dai cjamps pal prossim an agrari. Dutis lis ativitâts agrariis e lis stessis voris di ricostituzion des scortis, ancje pal riscjaldament vie pal Invier (len e une volte ancje cjarbon e torbe) a vevin di jessi finidis dentri de date di fonde di S. Simon (28-X). Tai zardins si cerpissin i arbuscj dai pomârs, si cjapin sù i bulbis di zîs, spadis, gjorgjinis pe lôr riposizion e conservazion in ambients secs e parâts; cul zovin di lune si moltiplichin par talee madreselvis, cameliis e bos. Si prontin ancje lis busis par implantâ gnûfs çocs dai rosârs. Tai orts lis feminis a puedin semenâ ancjemò brocui e spinazis, cevolis e puars, sblancjâ fenoi e selino e setâ i crisantems. Si proviôt a parâ lis plantis plui sensibilis dai prins frêts. ❚
____________
RINGRAZIAMENT AL AUTÔR
Gjavât fûr di “Il grant lunari dal Friûl. Sants, fiestis e tradizions dal cicli dal an” (Pasian di Prât, 2012): o ringraziìn l’autôr pe disponibilitât e pe colaborazion ❚ ✒ Redazion

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +