Sfuei Mensîl Furlan Indipendent
Archivi de Patrie

Il gnûf plan energjetic regjonâl. I numars e il futûr de Regjon in chest cjamp

............

Trop i mancjial al Friûl-Vignesie Julie par jessi autosuficient dal pont di viste energjetic? E in cont di energjie che e rive dal soreli, de aghe, dal aiar, dai refudums, in sumis des fonts rinovabilis, cemût isal metût? Indaûr o indevant rispiet ai travuarts europeans?
A son cualchidune des domandis di fonde che si puedin fâ par scomençâ a jentrâ tal complès e articolât Plan energjetic regjonâl, l’imprest che la Zonte e in particolâr l’assessôr al Ambient Sara Vito, e à metût adun par rivâ a fâlu bon in vie definitive dentri dal an. Cun di fat, daspò jessi stât aprovât in vie preliminâr de Zonte tal mês di Lui stât, propit in Setembar al è passât pes mans di tancj di lôr – dai sindicâts ai ordins dai professioniscj, par no dî des sociis che si interessin di ambient – cul intindiment di cjapâ sù dutis lis osservazions par rivâ a un imprest bon di segnâ in positîf i prossims agns de regjon in chest setôr.
DEFICIT DI ENERGJIE, MA SOT DE MEDIE TALIANE
Po ben, tal Rapuart ambientâl fat de Regjon tal mês di Mai di chest an e che al compagne il Plan – un document penç cun 50 misuris pratichis puntuâls e 31 schedis – si cjantin ducj i numars de situazion di dulà che si partìs: tal 2013, la ultime ricognizion disponibile, il Friûl-Vignesie Julie al veve un deficit di produzion regjonâl di energjie dal 8,8%, che duncje si à di impuartâ. Une mancjance un pôc plui basse de medie taliane che e je dal 13,2%, stant al rapuart sui “Numars statistics su la energjie eletriche in Italie” realizât di Terna.
La plui part de energjie e ven dai implants termoeletrics, po dal idroeletric e dal fotovoltaic. In chel an, i consums a son stâts di 9.603,1 GWh con 7.827 kWh par abitant, che e je la medie taliane plui alte, soredut pe manifature, in particolâr pe siderurgjie. Ancje in regjon il setôr che al “mangje” di plui energjie al è chel de industrie e daûr al ven il terziari, po la vite in cjase e la agriculture.
DI DULÀ CHE E VEN LA PRODUZION
La produzion di energjie eletriche chenti e je di 9004,8 MW e di cheste il 5,4% al è di fotovoltaic, 19,5% di idroeletric e 75,2% di termoeletriche. La incressite de potence dai implants eletrics di gjenerazion dal 2012 al 2013 e je lade sù dal 2,68% e la incressite di potence che si à vude dal 2008 al 2012 e je stade “cuasi dal dut” in gracie dai gnûfs implants fotovoltaics. In chei 4 agns, la energjie rinovabile in regjon e je aumentade dal 40%: al ven cussì cjapât l’obietîf di mieç par jessi in linie cun ce che la Europe e impon pal 2020.
OBIETÎFS
In cheste suaze, cuâi i obietîfs si ise dade la Regjon, tignint cont ancje des regulis e dai precets nazionâi e europeans, e cuâi i trois individuâts par realizâju? La idee, e à dit l’assessôr Vito, e je chê di une “bio regjon”, intune vision “transfrontaliere” e in linie cui obietîfs di “Europe 2020”, che a previodin la riduzion dal 20% di gas te atmosfere, la riduzion dal 20% di consums eletrics e la produzion di almancul il 20% de energjie che si à dibisugne par mieç di energjie rinovabile.
LA RIDUZION DES EMISSIONS
Si vûl, e à spiegât ancjemò Vito, “ridusi lis emissions dai gas che a provochin mudaments ambientâi e ridusi ancje i coscj energjetics midiant di trê azions: eficientament energjetic, doprâ di plui fonts rinovabilis, svilupâ la cognossince e la inovazion”. Tal stes timp, si è dit formalmentri “no” a cierts intervents: no al rigasificatôr di Zaule e al eletrodot talian-sloven Udin Ovest-Okroglo, superâ la centrâl a cjarbon di Monfalcon e no al eletrodot Somplât-Wurmlach, almancul che nol sei sot tiere.
Tal câs di un piçul rigasificatôr, in spiete de Valutazion di impat ambientâl dal ministeri, “bisugne viodi ben lis conseguencis su ambients e trafics – e à dit Vito -, cence prejudizi, ma ancje ricognossint che dongje di aspiets interessants a son chei problematics”.
VOTAZIONS
Tal troi di confront cul teritori, il Plan energjetic regjonâl al à bielzà cjatât il bon acet dal Consei des autonomiis, par vie che Comuns e Provinciis lu an aprovât cun 11 vôts a pro e 3 astensions, i Comuns di Gurize, Ruvigne e Tarvis. I sindicâts, Cgil, Cisl e Uil, invezit a àn solecitât “une proiezion dal impat dal Plan sul cost de energjie e su la ocupazion, che se nol è chel al devente dificil dâ une valutazion tal complès dal document presentât de Regjon”. ❚
Antonella Lanfrit

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +