In chescj mês te nestre Regjon al è un grant dibatit su la riforme dai ents aministratîfs: provinciis, comuns, acorpaments ben o mâl acetâts e contestâts dal teritori furlan, colegjos eletorâi, revisions fatis plui a taulin che tignint cont de storie, de gjeografie, e di une identitât culturâl… Ve culì l’impression di pre Antoni lant tal palaç. O sin tal 1984. Isal gambiât alc?
pre Roman
***************
Cun Luzie Sasso e Pieri Fontanin o ài stât ancje jo a compagnâ Fidrì dai Ros la dì ch’al veve di fâ la consegne simboliche des 93.541 firmis a pro de regjon autonome Friûl. Cuatri gjats par un fat straordenari.
Ant sarès tantis di dî su chê zornade: dal mausoleu che ti ven frêt dome a meti pît dentri, des corsiis colôr pantiane, de sdrume di scrivants e impiegâts e segretaris, dal fotograf che ti litrate e no ti consegne il litrat. O dai conseîrs ch’a balinin sù e jù, ca e là tant che furmiutis, ancje se lis furmiis a son nomenadis plui par chel ch’a fasin che no par trop ch’a balinin.
Mi fermarai a cualchi «flash» o lamp di chê storiche zornade.
Turel, ch’al è di Bicinins, par vie ch’al è president de regjon autonome «Friuli-Venezia Giulia» nol à podût scantinâ un et de sô incarighe olimpiche che lu sisteme fûr de storie, soredut de storie de sô int. Al à «cjapât at».
I conseîrs, a mieç dai rispetîfs deans, a vevin di dâsi dongje te sale colôr cîl ducj insieme. A son rivâts cuant che a àn podût e chei che ur à parût. A mancjavin i republicans, i liberâi, i socialdemocratics e, che nus à maraveât no pôc, i democristians. Al jere Cjarpenêt, ma rivât al ultin moment e a non so. Juste in timp par fâ une figure sclagne, ancje s’al à salvât la muse dal partît. Coerent il missin Morelli, restât ae Italie risorzimentâl; cjacaron De Agostini dal MF; un tic sirucât il comunist Pascolat; preparât e franc il DP Cavallo; imberdeât Cjarpenêt, che nol rive, insieme cun Bressani, a capî che i furlans a son minorance etniche. Chei che plui a àn fat dûl e rabie il sloven Stoka e il socialist Saro, furlan di Martignà.
Si scrupulave che Stoka, jessint minoritari, nus varès capîts. Invezit al à laudât che mai i triestins e l’unitât regjonâl, inventant miliarts che lôr nus varessin dât intant dal taramot (e no l’incontrâr, che lôr a àn roseât tai nestris dams) e paventant ce ch’al sucedarès se i triestins, spacantsi la regjon, no podaressin plui vignî a sgliciâsi in Friûl. E nissun nol veve fevelât di stangjis, anzit. Saro si è confessât che l’autonomie furlane domandade dai socialiscj dal ’78 al jere stât un at emotîf, su l’onde de furlanetât spissulade fûr cul sisme. Il gnûf verbo craxian al é: vê dut tun pugn par podê messedà miôr. Duncje nuie divisions, ma eficientisim.
Suntun pont ducj si son cjatâts dacuardi: che dibot 100.000 di lôr a son un fat «non trascurabile». Stranie cheste belance, di int che si bute malade cuant ch’e piert une zumiele di vôts e che no si scompon denant di un popul ch’al dîs di no a pleton a di une regjon bastarde!
A gustâ, che a àn ancje il bufet e convenient ancje, nus à fats restâ scaturîts il socialist Ermano, tumiecin. Al jere di vene juste. «Par nô cjargnei al esist un sôl nemì: il furlan, che nô cui talians si cjatìn benon!». «Se al jentre il furlan tes scuelis (la lenghe, n.d.r.), o tornìn indaûr di tresinte agns. Vuê tes scuelis si à di studiâ francês, inglês e rus. Crodêtmal a mi, ch’o ài mandât pal mont miârs di zovins des mês scuelis e che si àn fat onôr!».
O sin jessûts cun cheste figure mieze dirocade di un politic che si vante di vê mandât pal mont la sô int, impen di vêle fate restâ a scombati e a dâ il miôr di sè te sô tiere. No son ducj cussì, ma ti fore il cûr a sintî putanadis dal gjenar.
Di fûr al pluvisignave e al sbuereave che ti jentrave tai vues. Ma almancul si tirave il flât.
E nus è vignude une gole osteade di tornâ di corse di corse tal nestri Friûl, martar e par malis mans.
Tornant cjase, o ài provât ce ch’al veve provât chel gno frut ch’al veve scrit tun compit: «E così finì questa bella giornata!». Al veve stât tal cimitieri.
La Patrie dal Friûl, Març 1984 ❚
pre Antoni Beline
