Sfuei Mensîl Furlan Indipendent
Archivi de Patrie

SLOVENIE. Spionaç e scandui a frenin la soluzion dai problemis di confin tra Slovenie e Cravuazie

............

La storie infinide sul confin tra Slovenie e Cravuazie che e dure di plui o mancul 25 agns si è inricjide ae fin di Lui di un gnûf cjapitul.
Cuant che za al someave che si scugnìs dome spietâ la decision finâl de Cort pe comande ad hoc di bande de L’Aia, previodude par Dicembar (tant che anunziât de stesse Cort ai 10 di Lui), al è rivât un scandul intercetazions a creâ gnove tension. Il gjornâl cravuat Voaltrisčernji list al à publicât lis trascrizions, e in maniere seguitive ancje lis regjistrazions, di doi colocuis tra il judiç sloven de Cort pe comande Jernej Sekolec (chei altris membris a son il president Gilbert Guillaume, Vaughan Lowe e Brun Simma, sielts di Slovenie e Cravuazie di une liste predisponude de Comission europeane, e il judiç nomenât de Cravuazie Budislav Vukas) e de agjente slovene pe comande Simona Drenik, datadis ai 5 di Novembar dal 2014 e ai 11 di Zenâr dal 2015.
Dilunc di chestis conversazions, Sekolec al à furnît informazions risiervadis che a rivuardin l’operât de Cort ae agjente slovene, planificant cun jê la strategjie miôr par influençâ chei altris judiçs. Cun di plui, i à anticipât che, par ce che al tocje il confin maritim, la Slovenie e varès di otignî il 75 o il 66 par cent dal golf di Piran.
UN CUISTION DI AGHIS_ La Cort pe comande, che e je stade formade trê agns indaûr su la base di un acuardi cjapât intal 2009 tra i prins ministris Borut Pahor e Jadranka Kosor (e dopo ratificât dai parlaments – in Slovenie l’acuardi al è stât confermât ancje midiant di un referendum -), e je clamade di fat a decidi, in plui che sul confin terestri, soredut sul confin maritim, stant che la federazion jugoslave no veve mai delimitât lis aghis teritoriâls des variis republichis che le componevin. De delimitazion dal confin intal Golf di Piran al dipent se la Slovenie e varà o mancul l’acès diret des sôs aghis teritoriâls al mâr viert, e di consecuence il status di Paîs maritim. La Cravuazie e sosten che la Slovenie no pues vê dirit a plui de metât dal Golf e che lis leçs internazionâls a garantissin in dut câs ae Slovenie l’acès libar e cence fastidis aes sôs cuestis midiant lis aghis cravuatis o talianis.
LIS DIMISSIONS_ Sekolec e Drenik, dopo la publicazion des regjistrazions des lôr conversazions, a àn dât lis dimissions. Il guvier sloven, midiant dal ministri dai forescj Erjavec e dal prin ministri Cerar, al à fat savê di jessi dal dut estrani ae vicende, sotlineant la dibisugne di vê judiçs indipendents e super partes.
Il guvier sloven al à nomenât tant che gnûf membri de cort di comande Ronny Abraham, president de cort internazionâl di justizie. In Cravuazie lis polemichis a van indevant, i rapresentants dai partîts parlamentârs a son ducj dacuardi che la Cravuazie e varès di abandonâ la comande. Ae fin di Lui (intant che o sin daûr a scrivi, ndr) e sarà une sentade straordenarie dal parlament, ma dal pont di viste legâl nol è clâr se a puedin cessâ dal acuardi di comande o no.
Intant, la ministre dai forescj cravuate Vesna Pusić e à esprimût cruzi pes provis de cuintripart slovene di presentâ la cuistion tant che un câs di spionaç, pontant il dêt cuintri i cravuats. In ogni câs, al somee che no si puedi dineâ il fat che lis regjistrazions a sedin stadis otignudis dai servizis segrets cravuats che si son dimostrâts in chest câs plui abii di chei slovens.
UN STOP CHE SI SPERE NOL SEDI DEFINITÎF_ A nivel internazionâl, ma soredut in Slovenie, si augurin che chest scandul nol prejudichi la conclusion dal contenziôs che al someave aromai iminent. La cuistion sul confin tra Slovenie e Cravuazie e veve par un pôc di timp ancje blocât lis negoziazions cravuatis pe jentrade inte Union europeane. Fondamentâl par rivâ al acuardi di comande e je stade ancje la mediazion de Comission europeane. Prime, inte Sierade dal 2005, e jere stade la presidente di cumò de Cravuazie, e chê volte Ministri dai Forescj Kolinda Grabar – Kitarovič, a sugjerî al coleghe sloven Dimitrij Rupel di dreçâsi a un orghin judiziari internazionâl par delimitâ il confin maritim. Ancjemò prime – dopo che la comission slovene e cravuate pal confin, istituide intal 1993, no veve produsût risultâts definitîfs -, l’acuardi Drnovšek – Račan dal 2001 al veve fat sperâ inte pussibilitât di risolvi il contenziôs a nivel bilaterâl, che però la part cravuate e à mantignût par un an dome. ❚
Tjaša Gruden

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +