Sfuei Mensîl Furlan Indipendent
Archivi de Patrie

SLOVENIE. Daspò di un an dificil, il turisim sloven al cres intal 2015

............

Il turisim sloven al varès di jessi un dai setôrs clâf pe economie, ma al à dal sigûr ancjemò margjins di disvilup impuartants. In Slovenie dal sigûr no mancjin lûcs di interès turistic che a risaltin in diviersis classifichis dal setôr. Par citânt dome cualchidun, in plui de capitâl Lubiane, Bled, Bohinj, la grote di Postumie e lis grotis di Škocjanske, la stesse Val dal Lusinç… (pai interessâts a son disponibilis lis app par smartphone e tablet «Slovenia’s Top 50» e «Slovenia’s Top 100», ndr). Il setôr turistic, dopo un 2014 deludint, al è tornât a cressi: il numar di turiscj tai prins sîs mês dal 2015 al è aumentât a pet dal stes periodi dal 2014 dal 9,6%, intant che il numar di cui che si ferme a durmî al è cressût dal 6,6%. Il 65% di dutis lis visitis turistichis e il 60% des permanencis pe gnot a son stâts fatis di forescj, che il lôr rivâ in Slovenie tal prin semestri al è aumentât dal 10,3% a pet dal 2014 (i visitadôrs slovens a àn invezit fat regjistrâ un aument dal 8,5%). I marcjâts forescj plui impuartants dal turisim sloven a nivel semestrâl a son Italie (17%), Austrie (14,1%) e Gjermanie (10,4%), po dopo a vegnin Cravuazie, Serbie, Gran Bretagne e Russie. Tra lis destinazions preferidis i centris termâi, e po dopo i comuns di mont, il litorâl e Lubiane.
INCRESSITE CONFERMADE_ Ancje i dâts dal Ufici di statistiche statâl sloven pal prin semestri dal 2015 al somee che a confermin lis previsions di cressite dal World Travel & Tourism Council (WTTC) che al à analizât i dâts de industrie turistiche e butât jù il rapuart su la impuartance economiche dal turisim tai singui paîs. Pal 2015 al à cjapât in esam 184 paîs dal mont. Secont il WTTC, il setôr turistic sloven cun dut il so indot al varès di contribuî cuasi al 13% dal Pil sloven (mancul dal 4% se si considere dome la industrie turistiche), dant di lavorâ a 31.500 personis (il 4% di ducj i ocupâts slovens) inte industrie turistiche o 104.500 personis considerant ancje l’indot (13,1%). Daûr dal rapuart dal WTTC, la Slovenie e je al setantesim sest puest par chel che al inten la impuartance dal turisim pe economie e al sessantesim tierç puest par chel che al inten il contribût dal turisim al Pil. No mancjin dut câs altris pussibilitâts di disvilup. La Austrie par esempli si cjate al vincjesim, o ben al cincuantesim novesim puest tes dôs classifichis nomenadis in precedence, la Cravuazie al cincuantesim cuint e al decim novesim puest (daûr dal WTTC la incidence dal turisim sul Pil cravuat e sarà dal 12,5% o dal 28,6% considerant ancje l’indot). Di chê altre bande, sedi la Austrie che la Cravuazie a àn invistît inte promozion turistiche risorsis cetant plui impuartantis. Intal 2013 la Cravuazie e à „spindût“ 32,3 milions di euros e la Austrie 50, intant che la Slovenie e à destinât ae promozion turistiche (tal 2014) 5,5 milions di euros; chest an invezit, graciis ancje ai fonts europeans, 9,8 milions di euros.
RINOVAMENT ORGANIZATÎF_ E al è propit par miorâ chest aspiet che dal prin di Avost, doi agns e mieç dopo la sô fusion cun altris ents e a vincj de sô prime istituzion, e je stade ristabilide  la autonomie de Agjenzie publiche de Republiche di Slovenie pal marketing e pe promozion dal turisim, la Organizazion turistiche slovene (Slovenska turistična organizacija – STO).
LA GNOVE STRATEGJIE PAL TURISIM_ Trê a son i obietîfs principâi che si è prefissât l’ent pe promozion de Slovenie tant che destinazion turistiche tai marcjâts forescj: la riorganizazion de promozion, la predisposizion di un program bienâl di marketing eficaç e inovatîf e la prosecuzion des ativitâts promozionâls za in cors. La autonomie de STO e je stade volude dal ministri de economie Zdravko Počivalšek che secont lui la agjenzie e rapresente la base fondamentâl pal disvilup dal setôr. Il secont pas, pal ministri, al sarà un rinovament de promozion. E ancje par chest  i fonts in futûr a varessin di jessi aumentâts. Za in precedence Počivalšek al veve valutât che la Slovenie e varès di invistî inte promozion turistiche almancul vincj milions di euros ad an. ❚
Tjaša Gruden

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +