Sfuei Mensîl Furlan Indipendent
Archivi de Patrie

Elezions in Spagne: avançade de çampe, cualchi bon segno pai partîts nazionalitaris

............

Lis elezions aministrativis in Spagne si son tignudis ai 24 di Mai e i gjornâi a an zà sotolineât la dificoltât che e à vût de drete spagnole e la avançade de çampe di Podemos. Ve ca une analisi plui complete che cjape dentri ancje i partîts autonomiscj. Lis consultazions a àn interessât ancje i Parlaments des comunitâts autonomis dal Paîs Valenzian, des Baleârs, de Navare e des Asturiis.
Intal Paîs Valenzian il PP (Partido Popular, il centri-drete spagnûl e “spagnolist”, ndr) al reste il partît plui votât, ma al piert la maiorance assolude passant di 55 a 31 deputâts. I socialiscj invezit a son passâts di 33 a 23 parlamentârs. Cuntun grues salt indenant, al tierç puest si placin i nazionalitaris di Compromís cun 19 elets. Lis listis di Ciudadanos e Podemos/Podem a àn otignût 13 deputâts parom.
Ancje tes isulis Baleârs il PP e à pierdût la maiorance assolude colant di 35 a 20 elets. I socialiscj a àn invezit mantignût i lôr 14 deputâts. Podemos al è deventât il tierç partît des isulis cun 10 deputâts, intant che i nazionalitaris di Més per Mallorca a àn otignût 6 parlamentârs che si à di zontâur i 3 di Més per Minorca. Chei altris 6 puescj a disposizion a son lâts dividûts tra partîts plui piçui (3 elets pai regjonaliscj da El PI; 2 par Ciudadanos; e 1 par Gent per Formentera).
Un guvier des diestris al sarà dificil di ripeti ancje in Navare dal moment che i regjonaliscj de UPN a àn otignût 15 deputâts e i spagnoliscj dal PP a pene 2. A cressin i partîts nazionaliscj e nazionalitaris bascs cui 9 elets di Geroa Bai e i 8 di EH Bildu. Podemos e Socialiscj a àn 7 elets ognidun e Izquierda – Ezkerra e cjape doi parlamentârs.
Ancje intes Asturiis la diestre no à plui la maiorance cul PP che al va jù a 11 deputâts e Foro Asturias che a ‘nd cjape 3, compagn di Ciudadanos. I socialiscj a àn invezit 14 elets, Podemos 9 e IU-IX 5: avonde, se e fos la volontât, par meti sù une coalizion di guvier di centri çampe. ❚ ✒ Internazionalistari/LPdF

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +