ATUALITÂT – SunsAtor, viaç te musiche furlane di vuê

In machine, ator pal Friûl, cuntun amì che al vuide. E tu che tu cjacaris, sentât dongje, dal plui e dal mancul. Cence fastidis. Chest, in struc, ce che al à fat il regjist furlan Massimo Garlatti-Costa par fâ discuvierzi a la int i protagoniscj de musiche furlane.
Graciis ae sô idee, a son stadis realizadis dîs pontadis di une trasmission lade in onde sul canâl regjonâl de Rai, intitulade «SunsAtor». E che cumò il comun di Tavagnà al à pensât ben di ingrumâ intun DVD dopli.
I musiciscj furlans che a àn fat part dal progjet a son dîs: Fabian Riz, Cristina Mauro, Lino Straulino, Silvia Michelotti, i Slowmotion Apocalypse, Tubet, Aldo Rossi, Loris Vescovo, Glauco Venier e i Pantan. Ogni pontade e dure plui o mancul vincj minûts che a cjapin dentri une fevelade dal «intervistadôr V-jay» cul artist, trê videos dal musicist e un di un grup di une minorance europeane.
«O ai pensât di realizâ lis pontadis in machine, par vie che mi pareve la suaze plui juste par fâ cognossi chescj musiciscj – al conte il regjist, Massimo Garlatti-Costa – . Un lûc informâl, dulà che ognidun al è vêr, come che al è, cence pôre de telecjamare o dal presentadôr». E di fat, cussì al è stât. Ancje parcè che chescj artiscj no son masse usâts ai rifletôrs. Tant che Massimo, par metiju propit a lôr bielstâ, al à ancje platât i struments di riprese. Il risultât al è propit chel che al sperave il regjist. «Une tabaiade, come tra amîs».
Gianluigi Patruno, «Er Gegio» par intindisi, al à fat di V-jay, sù e jù pes stradis de regjon. Dîs i artiscj protagoniscj, come che o vin dit. «O vin sielt musiciscj difarents tra di lôr, cun progjets che a van dal rock ae musiche plui cjantautôral – al spieghe Garlatti-Costa – ancje par fâ cognossi un pôc di dut». Cuale ise la pontade che ti à plasût di plui?, i vin domandât. «Al è dificil rispuindi – nus à dit il regjist – parcè che ogni personaç mi à colpît pe sô semplicitât. A son personis di amirâ parcè che fâ musiche cumò, tal 2009, nol è facil e lôr lu fasin cuntune passion grandonone, cence pensâ masse ai bêçs».
Il dopli DVD editât dal comun di Tavagnà (in colaborazion cu la Regjon, la Casse di Sparagn dal F-VJ, l’Ente Friuli nel Mondo e la dite Moroso) si pues cjatâ in dutis lis bibliotechis dai comuns dal ambient furlanofon e, fin che no finiran lis scortis, li dal Sportel pe lenghe furlane dal comun di Tavagnà. Tal DVD, in plui des dîs pontadis di SunsAtor, si cjate ancje il «The best of SunsAtor», che al presente il miôr de serie documentaristiche, dut sottitulât par talian, spagnûl e inglês. E no je finide achì. «O stin lavorant par mandâ fûr ancje il DVD di une altre serie di trasmissions – nus spie Massimo Garlatti-Costa –, vâl a dî chês intituladis «A torzeon te culture furlane»». Simpri ator, simpri in machine, simpri cun personaçs che a àn tant di contâ. E simpri cun Massimo, platât daûr de telecjamare.
Valentina Pagani