Sfuei Mensîl Furlan Indipendent
Archivi de Patrie

SLOVENIE. I 70 agns di Primorski dnevnik, l’unic cuotidian par sloven stampât fûr dai confins de republiche

............

Setante agns indaûr, ai 13 di Mai dal 1945, intune Triest liberade di pôcs dîs (tra i 30 di Avrîl e i 2 di Mai dal 1945), al vignive fûr il prin numar dal Primorski dnevnik. Erêt dal Partizanski dnevnik, unic cuotidian stampât di moviments di liberazion inte Europe ocupade dal nazifassisim (al nassè a Zakriž, dongje di Cerkno, ai 26 di Novembar dal 1943), il Primorski dnevnik al ricjape la tradizion de informazion scrite slovene, costrete ae »clandestinitât«, dopo de sierade di Edinost – che al à dât vôs al prin moviment antifassist in Europe – ordenade des autoritâts fassistis ai 4 di Setembar dal 1928. A vuê, il Primorski dnevnik al è l’unic cuotidian di riferiment pe comunitât slovenofone in Italie, ma al è ancje l’unic cuotidian par sloven stampât al di fûr confins di chê republiche.
EDIZION SPECIÂL
Par celebrâ il setantesim aniversari dal numar 1, il Primorski dnevnik al è jessût cuntune edizion speciâl, vierzint cu la ristampe de prime pagjine de teztade di chê volte. Ai rapresentants dal cuotidian ur è stât dât acet pe ocasion dal president de Republiche di Slovenie Borut Pahor. Insiemi al diretôr Dušan Udovicˇ, a son lâts in delegazion a Lubiane ancje Jure Kufersin, president de cooperative editore che e deten la proprietât dal gjornâl (Zadruga Primorski dnevnik), Bojan Brezigar – president – e Pauli Mahorcˇicˇ – membri dal consei di aministrazion – de societât editore dal gjornâl la Dzp-Prae e i presidents des dôs organizazions di riferiment pe comunitât slovene in Italie, Rudi Pavšicˇ (Skgz) e Walter Bandelj (Sso). E je stade cheste la ocasion par ribati, ancje in cheste sede, lis dificoltâts finanziariis là che si cjate di almancul trê agns il cuotidian. I tais progressîfs ‘lineârs’ ai finanziaments pe editorie a àn costret i cuindis gjornaliscj dal gjornâl, distribuîts fra lis redazions di Triest e di Gurize, a ricori al contrat di solidarietât in vore aromai dal 2012. I rapresentants duncje si son augurâts che chestis dificoltâts a puedin almancul moderâsi cu la gnove leç – che si discut di timp – sui finanziaments ai orghins di stampe.
LIS INOVAZIONS
Dilunc dai agns, il cuotidian sloven al à savût inovâsi e adeguâsi in maniere progressive aes inovazions tecnologjichis de informazion; al à un sît internet inzornât in maniere fisse che midiant di chel al pues jessi ancje (abonantsi ae tetade) vê il gjornâl in version eletroniche. Ancjemò vuê al à duncje un rûl informatîf fondamentâl par dute la comunitât slovene de Regjon. Cemût che al à sotlineât il stes Udovič intune interviste publicade dal Novi Mataiûr (setemanâl dai slovens de Provincie di Udin) sul numar dai 13 di Mai, intai ultins agns il Primorski dnevnik al à ampliât il propri bacin di letôrs ancje inte Sclavanie Furlane (vals dal Nadison, de Tor e Resie). Chest – al à sotlineât Udovicˇ – midiant di doi fatôrs: l’inviament dal insegnament dal sloven standard – in graciis de scuele bilengâl di Sant Pieri dai sclavons, che e à tornât a svicinâ cheste part de comunitât slovenofone ae lenghe leterarie -, e la colaborazion cul Novi Mataiûr che al funzione cuasi di ‘redazion de Provincie di Udin’ pal cuotidian sloven, informant su ce che al sucêt ancje in chest teritori. Vint par cualchi timp lavorât in passât propit inte redazion dal Novi Mataiûr, Udovicˇ al à duncje sotlineât cemût che cheste esperience i vedi consintût di cognossi la realtât dal Friûl, une ‘part ad in plen dal nestri teritori’. ❚
Antonio Banchig

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +