La Cjargne e clope: viaç te crisi de mont

Cheste volte nol è nissun forest di dâi la colpe. Tocje dome fâ autocritiche. Par chel, cheste volte al fâs plui mâl dal solit. E cuissà trop timp che al coventarà par tornâ a fidâsi di cualchidun. Plui dai bêçs, plui dal orgoi, plui dal balin de cooperazion, la vicende Coopca, indipendentementri di cemût che e finirà, e lassarà une feride cetant profonde tal sintiment di fidance dal cjargnel, soredut dal cjargnel tai confronts di un altri cjargnel. Lait a sintî ce che a disin e ce che a pensin chei che a vevin metût tai lôr librets dute une vite di sacrificis, di fadie, di sparagns pe cjase di ricovar, pal funerâl, pe cjase gnove o pe universitât dal propri fi. Nancje se ur proponin un cont cu la garanzie dal Pape a tornaran a crodi al spirt di une cooperative. “Ben, a podevin stâ plui atents, controlâ i conts tes assembleis, prestâ bêçs par chei tas di interès cussì alts al doveve meti un gri tal cjâf, fâ nassi un suspiet” a ribatin un pâr di lôr. Valu a spiegâ al operari abituât al bon non che si è fate la cooperative cjargnele in plui di un secul di vite o al vecjut che no si intint di finance e che magari, cemût che cualchidun al à contât, al è stât “sburtât” e “convint” a sielzi un determinât plan di dipuesit. Si spere che la magjistrature e rivi insom a cjapâ i colpevui, tal stes timp però al tocje lâ indenant. Pensant ancje a chei che a pierdaran il puest di lavôr e che si zontaran ae schirie di disocupâts, ingrumade in chescj agns.
Sì, parcè che un altri grues probleme che al pese un grum su pe Cjargne al è, come dapardut, la crisi. Fasêt un zîr pai paîs a contâ lis gruis e i cantîrs vierts, o se no domandait ai perîts o ai architets trops progjets che a stan preparant. La edilizie e je ferme, e cun je dut l’indot, dal piastrelist al idraulic, dal fari al marangon. Tocje lâ oltri lis galariis di Damâr par podê continuâ a lavorâ. Une cjadene dure di rompi, soredut se la int che e reste e je simpri di mancul. Par fortune che lis fabrichis gruessis, da la Automotiv aes cjarteris, a dute chê sdrume di piçulis e mediis impresis sparniçadis tra Tumieç, Damâr, Paluce, Vile, Fors e  Dimpeç a resistin, se no e sarès peloche. Si dovarès fâur un monument a chescj imprenditôrs ma invezit lis gabelis a continuin a cressi. Alore, ce spietino a intervignî concedint incentîfs, par esempli su pal presi de energjie o niçantsi pe bande largje?
Di chê altre bande il turisim, la agriculture, il bosc a somein simpri che a stedin par fâ ale in gracie dal coraç e de intraprendence di une grampe di inovadôrs; si sint però che al mancje daûr un dissen gjenerâl che al fasi movi ducj dilunc de stesse direzion.
O tornìn alore al probleme des personis, dal guvier dal teritori, dai “manis” che o vevin tirât in bal bielzà tai mês passats propit su pe Patrie. Cjapitul chest, che al continue di un bande a paiâ la assence di un ent comprensoriâl legjitimât a rapresentâ dut il teritori (o sin al setim an di comissariament de Comunitât montane, juste par dî..) e di chê altre si è ingriviât ancjemò di plui cu la vicende Coopca che e à metût in lûs – finalmentri al dîs cualchidun – un sisteme di relazions e di podê che tai ultins agns al veve fat ploie e soreli.
La gnove butade di aministradôrs rivade l’an passât cualchi sperance le à tacade a dâ, ancje se e mancje di une cierte autorevolece a pet di une regjon un tic masse comandine. Par fâsi valê e vê un tic plui di vôs in cjapitul, nol sarès mâl tornâ a inmaneâ aleancis cul Tarvisian e cul Glemonàs.
Il timp al strenç, di int indi è simpri di mancul, e soredut atenzion ae emigrazion de nestre mularie: a stan partint simpri plui zovins. O savìn che al è just che a ledin a fâsi i vues ator pal mont: rindìnsi cont però che dificilmentri a tornaran intune tiere dulà che no varan oportunitâts. Sveìnsi prime che al sedi pardabon masse tart. ❚
David Zanirato