Sfuei Mensîl Furlan Indipendent
Archivi de Patrie

Analisi de situazion de puaretât: simpri plui penze par un teritori simpri plui vecjo

............

“La miserie no je dade dome de privazion economiche. Par dongje, tant che miserie si conte la mancjance di relazions e di servizis. Par chest, la puaretât e je une cundizion che e pues marcâ un grum di dongje i vecjos, e di chest tocje tignî cont tal prontâ un stât sociâl che al sedi inclusîf”.
Cussì, e à dit la conseire regjonâl dal Pd e neuropsichiatre infantîl Silvana Cremaschi presentant chê altre dì a Udin i numars su lis gnovis puaretâts in Friûl-Vignesie Julie e i principis che a fasin di fonde ae vore in cors tra Zonte e Consei regjonâl par meti adun i imprescj di jutori sociâl par impleâ te maniere miôr i 10 milions metûts di bande cun chest obietîf te leç finanziarie dal Dicembar stât.
“Par gno cont – e à dit – o pensarès ai vecjos che a puedin stâ in cjasis gaiarinis tal mieç dal paîs, cu la buteghe dongje dulà lâ a cjoli il pan e lis pastutis, ma ancje la floriste par une rose. E po, chestis cjasis si varès di pensâlis ancje dongje dal asîl e des scuelis, par che i vecjos a viodin i fruts e i fantacins, che li al sarès propit il lôr puest”. “Une suaze pardabon interessante”, al à comentât dilunc la cunvigne inmaneade alì de Fondazion Crup il diretôr de Patrie dal Friûl, Dree Valcic, “se nol fos – al à zontât – che magari cussì no a son simpri mancul i paîs dal Friûl cu lis buteghis tal centri storic e cuntune socialitât vivarose che e fasi sintî tal mieç de vite ancje chei che a son in là cu la etât”.
Insumiis, un Friûl che al scomence a fâ i conts cun aspiets de puaretât in part peâts ae economie, ma ancje  a aspiets sociâi che a àn a ce fâ cu la pussibilitât di partecipâ, di jessi a stâ in puescj dulà che e je int e servizis, di vê int zovine dongje che e sedi un jutori tal fisic e tal spirt. “O sin une regjon di vecjos – al è lât indevant Valcic – e il pericul di lâ devantdaûr al è simpri plui marcât”. Cun di fat, “e je int cun plui di 65 agns che e à di pensâ a cemût tornâ a imbastî la vite te ore de pension, ma a son personis di chê etât e plui indevant che no rivin ae tierce setemane dal mês”. In sumis, “jessi vecjo a Cjabie, Grau o Çarvignan e je une robe diferente”.
Une cuistion di stâ cetant atents ancje cuant che la miserie e tocje chê altre bande de vite, lis fameis cun fruts piçui. “La puaretât si trasmet dai gjenitôrs ai fîs, come che aromai al è stât certificât”, e à cun di fat sotlineât la miedie e politiche Cremaschi. “Adiriture, si à vût constatât che e à un efiet preditîf la presince di libris in cjase o ben la lôr mancjance”. Si capìs ben che la miserie no si trasmet par vie di sanc, ma al è il contest dulà che si cres che al pues fâ la diference. Par chest, e à dit ancjemò Cremaschi, “al è impuartant che une societât inclusive e puedi vê la pussibilitât de scuele a timp plen, il centri par mandâ i fruts di Istât, la pussibilitât di lûcs dulà che gjenitôrs e fîs a puedin stâ ben insiemi”. Duncje, “si à di meti dongje une pluralitât di azions, a son lis politichis di jutori che a traviersin plusôrs ambits che a puedin mudâ il doman dai fruts che a nassin in fameis puaris”.
Dut câs, la miserie no cjale la etât e ancje in regjon e cjape dentri dutis lis cundizions anagrafichis. “Il 12% de popolazion dal Friûl-Vignesie Julie al è in cundizion di puaretât relative”, e à inzornât Cremaschi, presentant i numars di un studi de Fondazion Brodolini fat suntun campion di doi mil fameis. “Un situazion che si rive a vêle cuant che intune famee di doi di lôr si pues vê dome 1.011 euros al mês par vivi”. E je la percentuâl plui alte di dut il Nord (9,6% a Nordest; 11,1% a Nordovest), si ben sot de medie taliane che e rive al 18,2%.
Prins al Nord ancje pes privazions materiâls, stant che a interessin il 4% de popolazion, cuintri il 3,3% dal Nordest e il 3,5% dal Nordovest. Par zonte, la puaretât e je ancje “dinamiche”, par vie che il 25,9% de popolazion che e je rivade a saltâ fûr de miserie al è tornât a plombâ intun stât di dificoltât dome dopo doi agns.
La leç regjonâl cui proviodiments par judâ i puars e varès di rivâ al dibatiment in Consei regjonâl tal mês di Jugn, cussì di jessi metude in vore in Autun. ❚
Antonella Lanfrit

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +