Sfuei Mensîl Furlan Indipendent
Archivi de Patrie

EDITORIÂL – Tornin a dâi sot pe nestre libertât

............


✽✽ Par capî ce che al sucêt in chest periodi, nol è mâl lâ a viodi ce che al è sucedût tai ultins mês. O fevelìn dal dibatiment su la cuistion de autonomie e de specialitât, sul doman dal Friûl, dal so rapuart istituzionâl cun Rome e ancje jenfri la stesse Regjon.
✽✽ Si sint ator un aiar gnûf, ancje se cualchi volte al somee, ai plui vecjos soredut, che si feveli simpri de stesse robe, ven a stâi de debilece de bataie politiche furlaniste cence un partît, un moviment di riferiment. In sumis: ducj a son dacuardi che si vedi di vê une organizazion politiche furlane par fâ l’interès dai furlans. Ma trops agns sono che chest convinciment al è tal cjâf di tancj militants de autonomie? O disarès di simpri e cualchidun, dopo la esperience dal Moviment Friûl, ma ancje di un toc de Leghe, al cirût di metisi dongje: lis siglis a son tantis e picininis. Ognidun cu la ciertece di vê la veretât inte sachete e di jessi miôr di chei altris.
✽✽ Ce isal mudât in chei mês achì par fânus fevelâ di une gnove stagjon? Di sigûr, la situazion de politiche taliane e il centralisim dal guvier Renzi, impuartât a nivel regjonâl de Serracchiani cu lis “riformis” de sanitât e dai ents locâi, in primis cu la cancelazion des provinciis. I metìn dongje ancje la gnove leç eletorâl, che e sdrume il numar di parlamentârs de Regjon.
✽✽ Pôc mâl, o disarês voaltris, viodût ce che a cumbinin a Rome, sotans des segretariis dai lôr partîts talians, ma ancje chest al è un segnâl impuartant di une situazion une vore clare: il Friûl al conte simpri di mancul, tant che e je vere che a son simpri plui chei che in Italie a domandin la abolizion de specialitât.
La mancjance di rapresentance, un teritori simpri plui sparniçât e cence identitât al à fat spiçâ lis orelis ai Comuns, ai sindics e ancje a cualchi politic.
✽✽ La rispueste e je vignude propit di un grup di sindics, chei de cjarte di Merêt: si son tirâts dongje e cul jutori di clapis di simpri leadis ae cuistion furlane – o sin ancje noaltris e Glesie Furlane – a àn inmaneât chel “Laboratori di autonomie” par puartâ indenant une vision identitarie e, cun cheste, frontâ lis cuistions che o vin denant, sedi istituzionâls che struturâls. La assemblee de comunitât furlane e je une lôr iniziative, e i sindics che a stan aderint a son simpri di plui.
✽✽ Di un altri comun, e rive in plui la idee di un referendum pe specialitât: chel di Rivignan – Teor, Mario Anzil, si è mot in cheste direzion e al vûl tirâ dongje 15mil firmis par fâlu.
Se cheste e je stade une rispueste dal bas, alc si è mot ancje suntun altri nivel: in consei regjonâl e je stade votade la leç che e ricognòs i 3 di Avrîl tant che une fieste uficiâl: e je passade cuntun vôt trasversâl. Par une volte, i conseîrs furlans a son stâts unîts, e la robe no jere scontade.
Restìn ai 3 di Avrîl, parcè che a Cividât e je sucedude une grande robe te messe de fieste: la Glesie, par bocje dal vicjari bonsignôr Genero, e à domandât cun fuarce la unitât dai furlans: “metìnsi dongje par difindi ce che o sin”.
No di mancul impuartance, il tornâ tal dibatit politic di Sergio Cecotti che, cun clarece, al à fat viodi ce che o podìn pierdi di un pont di viste economic cu la cancelazion de specialitât. No dome: “E vûl une rispueste fuarte – al à dit l’ex sindic di Udin – al centralisim talian. Si scuen fâi pôre e tornâ a dâi sot pe nestre autonomie”. La sô simpatie pe esperience scozese e je simpri plui clare.
✽✽ Alc si môf duncje, la cussience di jessi denant di un moment impuartant pal Friûl e je efetive. La stesse gnove leç e rint pussibile la presince eletorâl di une fuarce “rapresentative” de minorance linguistiche. Si à di rivâ al 20% dai vôts.
Di sigûr nol sarà un om o une femine tal parlament talian a cambiâ il nestri destin, ma e sarès une biele dimostrazion che i furlans no son plui sotans. Un tic, tant che i scozês.❚
Frache chi par un aprofondiment su la Scozie.
flicDree Valcic

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +