Sfuei Mensîl Furlan Indipendent
Archivi de Patrie

IL FERÂL. I FURLANS E IL TEMPLI (decime tierce – fin)

............

Il “Ferâl”, la rubriche dedicade a pre Antoni Beline, e je lade indevant riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
***
(decime tierce pontade)
[…]  I FURLANS E IL TEMPLI
5.    I FURLANS CENCE TEMPLI
Situazion di post-cristianesim
Ancje il nestri Friûl si cjate tal post-cristianesim e i spiei ju vin sot i vôi. Seminari cence clerics, canonichis cence predi, glesiis sieradis o viertis a tessare, bancs simpri plui vueits, morâl simpri plui ininfluent, confessionaris cu lis telis di rai, cjampanis che a sunin simpri di mancul e simpri plui dibant. La glesie, che e veve inviestît dut sul templi e su la struture, si cjate te crisi plui nere e no sa ce fâ. O e cjape il svual pe stratosfere cun discors fûr dal timp, o si sbroche dant la colpe a la int e a la inicuitât dai timps, o si bute dal volontaritât e tal sociâl savint che puars int sarà simpri, o si autocosole tai troputs di associazions carismatichis lassant che la fole e ledi pal so destin. No savint o no podint cambiâ, e cîr di vivi dì par dì cence cjalâ masse indenant. Ma la fin e je insorabil e no je lafè lontane.
Dut chest al à conseguencis diferentis a carat de formazion o deformazion diferente. Intune glesie clericâl e ipercatoliche al cree un sens di disperazion e di disorientament; là che invezit la (pre)potence clericâl e jere mancul sintude o acetade, si varès di vê mancul aviliment o adiriture une sorte di liberazion di un jôf che al sofegave. Tal câs dai Furlans, che a àn plui subît che bramât il templi, no varès di jessi la fin dal mont. Ancje pal fat che la frecuence ai sacraments e a la glesie nol è che e ves vût chel efiet rivoluzionari e santificant che si varès podût spietâsi. Cumò e ven mancul int di une volte ma nol è che la vite concrete e sedi tant diferente. O sin simpri tal contest di un san ateisim o, come che al diseve Peppone, “dignitosa indifferenza”. La tragjedie no je che la int e ven pôc in glesie, ma che chei che a van simpri no son masse diferents di chei che no van mai. Pa la cuâl, denant di un templi insignificant e in crisi, tocje cirî une religjon plui incisive e plui peade a la vite, ancje se al sarà dificil par int usade a cjapâ ordins simpri e dome dal plevan.
Tentatîfs di restaurazion
A contestâ e a dineâ cheste insignificance e cheste crisi dal templi e sta l’imagjin di fuarce e di vitalitât de glesie catoliche, a partî de elezion di pape Wojtyla, rivât de Polonie, de periferie dal imperi, a rivitalizâ un organisim strac e spompât. I viaçs, i discors, il spetacul, l’amplificazion massmediatiche lu àn fat deventâ un pont di riferiment a nivel mondiâl. La mancjance di figuris carismatichis, la fin impietose des ditaturis, lis grandis cuistions de justizie e de solidarietât planetarie a àn fat di chest pape un leader osanât, scoltât, riverît, idolatrât come un showman o une superstar. Dut chest al à vude une acelerazion sapiente e costante tai agns dal pontificât, cuntune grande vierzidure ad extra e une ferme e rissolude ricompatazion ad intra, par preparâ la grande svoltade milenarie o milenaristiche, cu la proliferazion di iniziativis lis plui disparadis e discutibilis che i permetin di tignî impiade l’atenzion di dut il mont. Ultime, pal moment, la regjie sapiente sul segret di Fatime. Une escalation di antecipazions, indiscrezions, precisazions fint a l’esplosion dai 13 di mai, cuant che il gard. Sodano, plui amì di Pinochet che di sûr Luzie Dos Santos, al à viodût tal atentât di Alì Agca al pape il spieli plui traumatic di un secul che in fat di violencis e di sanc ind à viodudis ben di piês.
Fevelant dal gjubileu, une persone documentade e influente de curie di Udin mi à dit che il gjubileu dal 2000, plui che une puarte sul gnûf secul e milenari, al somee une riproduzion anastatiche dal prin gjubileo, chel dal 1300, e pape Wojtyla al cjape simpri di plui la conotazion di pape Caetani, cognossût miôr cul non di Bonifazi VIII, il grant teocratic. Di fat Zuan Pauli II al è un pape che al à concentrât dut sul templi, sul cult, su lis celebrazions, sul aparât teologjic e eclesiologjic, su lis definizions siguris e incontestabilis. Chest tal moment plui grant de secolarizazion e dal pluralisim culturâl. Si trate di un tentatîf globâl di restaurazion che al scuen acelerâ une sfide inevitabil fra glesie e mont.
In realtât la fuarce dal pape e de struture glesiastiche e je plui virtuâl che reâl, dal moment che ancje la glesie e à sielt il mieç virtuâl par fâ rivâ la sô vôs fin ai ultins cunfins dal mont. Rivâ in ogni cjase cu la figure dal pape e cu la sô peraule nol vûl dî rivâ inte cussience di ogni persone. Vê une audience planetarie a lis celebrazions de glesie di Rome nol vûl dî vê une adesion unitarie e convinte al vanzeli. Chei che i batin lis mans al pape nol vûl dî che a metin in pratiche lis sôs peraulis. La cuintriprove le vin te vite concrete de nestre int, che e fâs lis sôs sieltis morâls in maniere indipendente e dispès contrarie a ce che la glesie e insegne. Se nô o lin a cjalâ l’audience, o disìn che il templi al ten e al recupere, ma se o cjalin la realtât o viodìn che il templi, e dut ce che al zire ator dal templi, al è in angustiis ireversibilis. E nol zove, a consolâsi di une pierdite reâl, un vuadagn virtuâl, a nivel e a carat di spot o di prodot publicitari. Partant si ripropon intîr il discors su la ridimension inarestabil de influence dal templi su la vite de int, comprendude la vite dai bogns catolics furlans.
Une ocasion par riscatâ e ricjatâ la nestre anime
La gnove situazion, no volude, e pò deventâ un moment di gracie se nô Furlans o sarìn in grât di ricjatâ la nestre anime gjenuine, libare di incrostazions e di condizionaments creâts dal timp e de struture ma che no àn nissun rapuart cu la novitât e la libertât dal vanzeli. No sai ce che al sarà dai Furlans. No soi profete ni fi di profete. O speri e mi auguri che la fin di un mont no sedi la fin dal mont e che a rivin a cjatâ, cun inteligjence, pazience e fadie, la lôr maniere di incjarnâ la fede tal agâr de nestre storie e culture. Di podê onorâ Diu onorant chê identitât, peculiaritât, filusumie che lui ur à dât.
O varìn partant une religjon plui peade a la Scriture che a la dutrine o a l’indutrinament. Vignint a calâ, se no a sparî, l’influence clericâl, o varìn une religjon che e privilegje la sielte personâl, mancul sigure, plui patide ma ancje plui sintude. Il prin milenari al à viodude la glesie a nassi, a cressi, a passâ des catacombis a la libertât. Il seont milenari al à puartât a l’esplosion de organizazion e de struturazion glesiastiche. Mi plasarès, e o speri, che il gnûf milenari al sedi il milenari de cussience, de tolerance, de religjon come armonie. Une glesie che si slargje al mont e a dutis lis realtâts bielis e brutis; une glesie che si disfe, si piert, e mûr tal cjamp dal mont. Une glesie di soldarietât cui ultins, alternative al mont in sens evangjelic. Une glesie e une religjon che e à la fonde su la cussience e l’onestât, là che al è puest ancje pal cult e pal templi, ma dome come coronament e completament e no come sostituzion o alibi de onestât. Une glesie e une religjon, dut somât, plui adate al nestri mût di sintî e di vivi i valôrs spirtuâi e duncje une ocasion buine par che i Furlans a puedin laudâ Diu seont la lôr sensibilitât.
Si trate di une sfide, di une sperance, forsit di une utopie. Ancje pal fat che la glesie clericâl e peade al templi no à savût insegnânus a cressi, a deventâ atôrs e protagoniscj, a saltâ fûr dal templi, a deventâ predis che a ufrissin in totalitât la lôr vite in ogni aspiet e moment. Par altri la fin dal templi e je segnade e no ’nd è alternativis. Tant val armâsi di fiducie, di positivitât, di fede in Diu e in nô e vierzi une gnove pagjine di storie ancje in chel mont misteriôs, impuartant, vitâl che al è il mont dal spirit. E il Diu di Abram, il Diu di Isac e il Diu di Jacop (Mt 22,32), il Diu dai vîfs e no dai muarts, il Diu che al à compagnade la gjenerazion dai vons e dai paris al compagni ancje la gjenerazion nestre e dai fîs e dai nevôts tal tornâ dongje de dispersion e de sotanance e tal fâ sù il gnûf templi: il templi dal creât, il templi de cussience, il templi de Scriture, il templi de libertât, il templi de armonie fra glesie e mont, fra tiere e cîl, fra storie e metastorie, fra timp e eternitât. Vençon, ai 28 di Mai dal 2000 ❚
FIN
pre Antoni Beline

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +