Sfuei Mensîl Furlan Indipendent
Archivi de Patrie

Disavualance e puaretât

............

Intal lengaç di vuê, il tiermin ”avualance” al è dal dut in disusance. Chest, ancje se la stesse nestre democrazie e cjape legjitimazion, fondis e aliment de aspirazion e de vocazion a ufrî a ducj i citadins lis stessis oportunitât di cundizions, par podê cussì esercitâ la partecipazion politiche, civîl, economiche e sociâl.
Si è afermade une acetazion passive dal fat che areis largjis dal planet, Paîs intîrs e fintremai i nestris concitadins e vicins di cjase a puedin vivi in cundizions di dibisugne.
Vuê il sintî comun nol è plui chel che al stime impuartant il benstâ di ducj e no dome chel di cualchidun, parcè che e à vinçût la pulsion egoiste e avide dal individui.
Si è abdicât al principi de justizie sociâl e in chest mût si ofindin une dì daûr chê altre chei plui puars.
No si capìs nancje che la disavualance e je une menace par ducj, stant che e puarte cun se rabie, violence e insigurece, cun coscj sociâi dramatics e cressints.
Cun di plui, un alt nivel di disavualance al rapresente un impediment reâl ae cressite economiche, e si varès di capî che “eficience sociâl” e eficience economiche a van cul stes pas, e che nol pues jessi cressite in cheste situazion inicue.
In chest contest culturâl e di valôrs corot e in disfasiment, e va funzione une inedite “lote di classe”, condusude dal alt viers il bas, dai siôrs cuintri i puars, dai prins cuintri i ultins.
I risultâts di cheste lote di classe stranie e crudêl a son micidiâi.
Intai ultins trente agns, l’1% dai plui siôrs dal mont al à viodût a cressi il propri redit dal 275% e, di cuintri, il 20% di chei plui puars a àn vût un misar 18% in plui. Un cuint de popolazion mondiâl al gjolt dal 75% dal redit anuâl di dut il planet e il cuint plui puar si contente dal 2%. Il 60% de popolazion mondiâl al vîf cun 1 o 2 dolars in dì.
Intai paîs ocidentâi, simpri intai ultins trente agns, si è vût il moviment di redit plui imponent che si sedi mai verificât viers chei plui siôrs.
In Italie, la inicuitât economiche e je sore de medie dai Paîs de OCSE. Il patrimoni dai 10 talians plui siôrs al è compagn di chel dai 3 milions plui puars. Il 10% des fameis plui sioris al deten plui o mancul il 45% de ricjece nazionâl. Il 50% des fameis al à mancul dal 10% de ricjece complessive.
Si è vuastât l’assensôr sociâl e la situazion e je al pont di roture.
E la CISL teritoriâl e stime che la coesion sociâl e puedi jessi dome se si aferme une vere justizie sociâl.
Il teme de puaretât, cun di plui, nol à nissun spazi intal dibatiment politic, nol è in assolût une prioritât cemût che, invezit, al varès di jessi.
Vuê, intal mont, un miliart di oms a son in cundizions di puaretât, 900 milions no disponin di aghe potabile, 2 miliarts e 600 mil no gjoldin di nissun servizi sanitari.
In Europe, a son 120 milions lis personis in puaretât e, di chês, 42 milions a son inte miserie assolude.
In Italie, a son plui di 3 milions lis personis che a vivin in cundizions di puaretât assolude e al è triplicât il numar di fameis cence cjase.
Il nestri Paîs al è l’ultin sui finanziaments ae fameis, dal sigûr il piês cuntun vergognôs 1,3% dal PIL.
Un frut su cuatri al vîf in fameis che no puedin garantîi il necessari par une sô buine cressite fisiche, psicologjiche, inteletuâl e sociâl. A son 500 mil i fantaçuts che a son in cundizions di puaretât assolude. L’abandon scolastic al cres, e il 30% di cui che si iscrîf aes superiôrs nol rive ae maturitât. Dome il 20% dai fîs di operaris al rive ae Universitât, cuintri plui dal 60% des classis abenadis.
In Friûl Vignesie Julie, intal ultin deceni, e je comparide la puaretât alimentâr. Un aspiet dal sigûr gnûf, chest dal bisugn di mangjative, che al è daûr a cjapâ dimensions tant preocupantis. Intai ultins 5 agns, in Regjon, il numar dai bisugnôs di mangjative al à passât lis 50 mil unitâts; e je dopleade la cuantitât di mangjative distribuide e la incressite dai assistîts al lenç lis 24 mil personis (+ 85,8%). Chescj a son segns tangjibii e estrems dal impuariment de societât regjonâl e ancje de grande dignitât che cun chê lis fameis e lis personis lu stan patint e frontant. Il fenomen nol ven evidenziât pal pudôr des fameis coinvoltis.
La CISL locâl e stime ridutîf resonâ dome su la crisi di chê che i disin classe medie, intant che al va ricuardât, di un continui, che a son pardabon tancj chei che a àn sorpassât za il limit de puaretât o che a son li li par passâlu.
La CISL di Udin, cun di plui, e je convinçude che la politiche, duncje il Stât, e la societât, duncje lis comunitâts, a scuegnin in maniere urgjente e responsabile fâsi cjame dal drame de puaretât, se di no par milions di citadins cheste e sarà une condane cence apel.
La CISL furlane, infin, e pense che si vedi di tornâ a jessi une “comunitât di destin” là che il destin di un al è il destin di ducj e la puaretât no je il probleme dal singul ma de coletivitât.
Za intal 1977 Bonsignôr Alfredo Battisti al diseve che “di une societât dal consum e dal profit, tocje passâ a une societât de condivision e de gratuitât. E je une civiltât che e à di cambiâ; e je une gnove mentalitât che e à di nassi; al è un impegn straordenari di revision personâl e comunitarie, sociâl, economiche e politiche che e à di disflorî”. ❚
✒ Roberto Muradore

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +