Sfuei Mensîl Furlan Indipendent
Archivi de Patrie

La riforme dai ents locâi par sfruçonâ il Friûl. Interviste al president Fontanini

............

Idealitât e pragmatisim si cjatin in cubie tes posizionis di Pieri Fontanini tant che president de Provincie di Udin, in chescj mês dulà che, elet de int ae prime votazion tal 2013, al à di fâ i conts cuntune Regjon che e à decidût e metût in leç la fin des Provinciis.
Une azion che lui al lei prin di dut tant che une operazion par “sfruçonâ il Friûl”. Dividût in tantis Uti, lis gnovis Unions comunâls, “nol varà la fuarce dai numars par oponisi al neocentralisim regjonâl”. Dut câs, se cheste cumò e je la realtât, la sô posizion stant a palaç Belgrât no je par nuie di rassegnazion.
Biel che al spiete, e no dome lui, il pronunciament de Cort Costituzionâl in cont de leç regjonâl che e à mudadis lis Provinciis in ents di secont grât gjavantjur funzions – la vôs de Consulte le à domandade il Tar F-VJ e e varès di rivâ in Primevere -, al à a pene cjapade une posizion fuarte e clare su la composizion des Uti sul teritori udinês.
“Bisugne che i Comuns ator di Udin si metin insieme cu la citât, par rivâ a fâ une realtât sui 250mil abitants”, al dîs. “O vin di rivâ a stâ unîts par difindi i interès dal Friûl”. Par lui, se e nassès chê che e ven clamade ancje la “grande Udin”, si varès “la pussibilitât di vê une realtât significative dal pont di viste dai numars e no si lassarès in regjon il paronamint a chê uniche grande realtât che cumò e esist, ven a stâi Triest”.
Il leghist Fontanini su la Uti udinese, duncje, in plen acuardi cul sindic de citât, Furio Honsell, che politichementri al sta di chê altre bande? “No”, al precise subit Fontanini, par vie che “la mê idee finâl e je diferente. Jo o speri che si rivarà a savoltâ cheste leç des Uti e la grande Udin e sei il prin pas par une mobilitazion popolâr par ricomponi la zone furlane – ven a stâi la Grande provincie dal Friûl -, obleant la Regjon a istituî dôs areis aministrativis: la Provincie dal Friûl, tant a dî l’insieme dai teritoris di Udin, Gurize e Pordenon, e la aree metropolitane di Triest par dute la Vignesie Julie”.
Il rest dal teritori de provincie, al continue Fontanini, al cjatarà unions sui 50-60 mil di lôr, ma l’avignî de fuarce dal Friûl, seont lui, no si zuie di altris bandis, ma te soluzion che si cjatarà a Udin e tal so dulintor.
Fontanini no si nascuint che almancul cumò in regjon no je une fuarce politiche che e rivarès a vê la maiorance cuintri il Pd e il centrisinistre. Si ben che la Lega e sei in cressi, la situazion tal cjamp dal centri-drete e pâr avonde debule, ma lui no si scompon. “In politiche lis robis a cambin ae svelte”, al dîs, tignint di cont di une esperience aromai lungje in chel teren. “Ancje cumò la cuistion e je dinamiche, cun plui o mancul barufis, si capìs, ma al è simpri sucedût”.
In spiete des evoluzions politichis-partitichis, dut câs, cumò la logjiche dal president che al vuide ancje la Union des Provinciis, e je chê di doprâ i imprescj che si àn a disposizion. Par chest il so sburt par che i sindics a doprin la riforme dai ents locâi Serracchiani-Panontin par fâi di cuintripês “ae prepotence regjonâl”.
Se, fedêl ae sô culture federaliste, no i fâs pôre il Venit che al domande ancje lui di jessi regjon a Statût speciâl – par me la specialitât le podaressin vê ducj, intindude come gjestion responsabil dai bêçs des tassis paiadis dal teritori e che duncje alì a an di fermâsi -, al è in vuaite sui resonaments in cont des grandis regjons.
“Si capìs che lis Regjons speciâls a son consideradis pericolosis e che il riscjo al è che si salvin dome chês che a son garantidis di acuardis internazionâi”, al dîs. Cundut a chel, al zonte subit, “se si salvin Bolzan e Trent, al à di salvâsi ancje il Friûl, par vie che lis condizions a son lis stessis: ven a stâi che i furlans, i slovens e i todescs dal Friûl a àn i stes dirits di pupilance dai todesc e dai ladins dal Trentin-Sud Tirôl”.
Par Fontanini, no son sants, “la regjon, pe presince des minorancis, e à di vê un status particolâr. Chest al è un discors che in Europe al è plui che acetât, baste cjalâ ae Spagne cu la Catalogne e il Paîs Basc, ae Grande Bretagne cu la Scozie e il Gales, ae Belgjiche. La nestre situazion, duncje, no je une anomalie taliane, ma une condizion tipiche europeane”.
E reste però tal aiar une domande: il Friûl – VJ, cheste sô specialitât aial pardabon voie di difindile? “No pues vêle ni Triest ni la presidente Debora Serracchiani – al rispuint Fontanini – Prin di dut a àn di vêle i furlans e i slovens che a son lis minorancis plui fuartis e implantadis tal teritori. Il moment nol è sempliç, ma jo o viôt la strade a clâr – al sotlinee il president Fontanini -: nus salve dome une pupilance costituzionâl e europeane”.
Intant, ae fin di Zenâr al à scrit ancje al ministri pes riformis, Maria Elena Boschi, par che Rome e modifichi il Statût de Regjon, dulà che si scancele il tiermin Provincie, dome dopo che e je stade fate la riforme costituzionâl dal Titul V de Cjarte e la modifiche dal Senât. E chest par che la Regjon “no puedi, daspò de modifiche, scancelâ lis Provinciis cuntune sô leç ordenarie ancje prin de fin dai mandâts dulà che i rapresentants politics a son stâts elets in maniere democratiche. Cun di plui – al siere – tal rest de Italie la leç Delrio no à scanceladis lis Provinciis, ma mudadis in ents di secont grât”. ❚
Antonella Lanfrit

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +