Sfuei Mensîl Furlan Indipendent
Archivi de Patrie

LABORATORI DI AUTONOMIE. 5. MERÊT, Politiche e Europe; conclusions

............

“Al è biel fevelâ di autonomie, ma cumò vonde: tocje fâle cressi e la uniche maniere no je spietâ concessions che a vegnin di Rome o di Triest, ma spandi ledan parcè che la vision autonomiste e identitarie e cressi dal bas, dai Comuns e des associazions”. Peraule di Massimo Moretuzzo, sindic di Merêt, che sierade la schirie di incuintris dal “Laboratori di autonomie” al mostre dute la sodisfazion par un percors che “al à clamât dongje tantis realtâts che si son cjatadis spontaniementri, di bessôi, cence nissun che al vuidàs un procès che al è stât dal dut naturâl e in nissune maniere eterodiret”: chest al à permetût di organizâ cinc seradis dutis vivarosis che a àn mostrât che la autonomie e je vive, almancul a scoltâ lis tantis vôs diferentis, di drete, di çampe o cence partît, che a àn partecipât ai dibatits.
“Il biel dal Laboratori al è stât propit chest dâsi adun di furlans che magari la pensin ducj in maniere difarente ma si ricognossin tal jessi furlans e te dibisugne di une gnove concezion di autoguvier che e partissi dal bàs, di une cussience gnove dal fâ valê lis esperiencis che a cressin sul teritori. Chest mût di pensâ – al continue Moretuzzo – al sta cressint simpri di plui soredut jenfri dai aministratôrs, parcè che vuê si cjatin ducj a jessi di bessoi di front de lôr int. Ni Rome ni Triest a dan rispuestis convincentis e no je tante voie ni possibilitât plui di stâ a spietâ: tocje movisi come che o vìn fat noaltris. O vìn podût meti in rêt Comuns e personis, sburtâts come che o jerin di une riforme dai ents locâi fate masse a la svelte e cence consultazion. O vìn cirût di dî la nestre e ae fin o sìn rivâts a otignî un bon risultât cu la aprovazion de norme pe costituzion de Assemblee des Comunitâts Furlanis che e à cjatât il bon acet di 27 conseîrs regjonâi. “Si è creade une biele alchimie – al dîs – par resonâ di chescj temis e ancje de propueste dai subambits par no scancelâ dal dut lis identitâts dai paîs”.
La vision autonomiste no je duncje une ereditât dal passât, ma une clâf di leture pal avignî: ancje dai grancj problemis come lis infrastruturis e il lavôr. E pai cambiaments che a laran incuintri la nestre societât e la nestre economie. “Mi plasarès che cheste esperience e continuàs – al conte il sindic – e forsit propit la Assemblee des Comunitâts Furlanis e podarès jessi la suaze ideâl par tignî dongje lis discussions di caratar culturâl, linguistic, ma ancje politic che o vin podût condusi in chest periodi”. Di fat la voie di autonomie e cres: “la dimostrazion e je che noialtris sindics – al fâs clâr Moretuzzo, che al à coordenât cul coleghe di Cjarlins Diego Navarria i prins citadins di Flaiban, Flumisel, Listize, Muçane, Prissinins, Rivis Darcjan, Sedean, Tor di Zuin, Tramonts di Sot e Vît – o sin partîts in 12 e o sin rivâts in 15, parcè che si son dâts dongje ancje chei di Bertiûl, Dolegne e Maran”.
La rêt cuindi si sta slargjant e nus permet di viodi cun voi diferents tancj schemis che nus somein imutabii: “par esempli – al spieghe Moretuzzo – si pues ancje fevelâ di formis alternativis di economie di prossimitât che inte globalizazion di vuê a somein impossibilis. La economie locâl e domande però creativitât, nissun no nus insegnarà cemût lâ viers de gjestion dai nestris bens e des nestris risorsis. ❚
Walter Tomada

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +