Sfuei Mensîl Furlan Indipendent
Archivi de Patrie

LABORATORI DI AUTONOMIE. 2. FLAIBAN, Lenghe e culture

............

Dopo de scree a Cjarlins, la seconde serade si è davuelte a Flaiban, ospits dal sindic Luca Picco, che di paron di cjase al à viert lis voris.
Prin di dut a son stâts subit confermâts i elements di fuarce des seradis dai laboratoris di autonomie: grande partecipazion di int e di aministradôrs.
La sale si è jemplade di corse e i passe cent di lôr a àn cjapât puest par scoltâ i ospits de serade moderade cheste volte di William Cisilino, diretôr de ARLeF – Agjenzie regjonâl pe lenghe furlane.
A son intervignûts Pauli Cantarutti, president de cooperative Informazion Furlane che e gjestìs Radio Onde Furlane; pre Roman Michelot, figure di riferiment di Glesie Furlane, Franco Fabbro e Marco Stolfo de Universitât dal Friûl. Al veve di jessi ancje Aldo Colonello, che però nol à podût partecipâ.
Il teme de serade al zirave dut su trê cuistions fondamentâls, ven a stâi “autonomie, culture e lenghe”.
Lis domandis di Cisilino a àn puartât ducj i relatôrs in cunvigne sul leam indissolubil dai trê elements, ma tal stes timp al è vignût fûr in maniere evidente che i bogns proposits a son smentîts te realtât dai fats, dulà che dispès a prevalin ategjaments di “sotans”. “La storie dai Furlans e à condizionât cheste situazion” al comente il diretôr Cisilino, ma buine part des responsabilitâts a son ancje des istituzions publichis, de glesie e dai partîts che no son stâts bogns, o piês, no àn volût interpretâ la funzion che la lenghe furlane e varès podût zuiâ te realtât regjonâl.
“I intervents a àn ancje metût in evidence che ancje la scuele no à fat ce che e varès podût e che la leç e varès previodût su chest teme” al continue Cisilino “no simpri vierte tai confronts dai dirits des minorancis”.
Ce fâ duncje par ribaltâ cheste vision?
O vin domandât un coment ancje al nestri president pre Roman Michelot, che pe ocasion al à puartade la vôs di Glesie Furlane “No si à di dâ colpe ae int che par secui e je stade tibiade dai sorestants: fale il ‘salustri’ di glorie che al è stât il Patriarcjât, de Republiche di Vignesie in ca, fin a chê taliane, chei che a comandavin a àn simpri fevelade une lenghe diferente di chê dal popul, che nol veve alternative se no tignî pleade la schene e sbassâ il cjâf. Cui aial la responsabilitât par saltâ fûr di cheste situazion? Dome la culture e pues jessi chê lûs che e fâs vierzi i voi al popul e i fâs cjapâ cussience de proprie identitât: duncje ancje i inteletuâi a àn di cjapâ in man la cuistion e stâ de bande dal Friûl”. ❚
Christian Romanini

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +