Giulia Daici e Elsa Martin par furlan al Premi nazionâl “Bianca d’Aponte”

Ai 24 e 25 di Otubar li dal Teatri Cimarosa di Aversa, in provincie di Caserta, a son tal grup de decime edizion dal premi “Bianca d’Aponte” lis nestris Giulia Daici e Elsa Martin. Sielzudis jenfri plui di 140 artistis che a vegnin di dute Italie, lis cjantaudoris furlanis a son jenfri lis 11 finalistis dal premi dedicât al cjantautorât feminin cu la direzion artistiche di Fausto Mesolella. Lis dôs a presentin doi tocs in lenghe furlane, “Aiar” par Giulia Daici e “Cjante” par Elsa Martin (cjançon che pal test e puarte ancje la firme di Stefano Montello). No je la prime volte che Giulia e Elsa a puartin la marilenghe fûr dai confins regjonâi. L’an passât Giulia e je rivade seconde ae “Targhe Tenco” inte categorie miôr “Album in dialet e lenghis di minorance” cul disc “Tal cîl des Acuilis”. Tal 2012 Elsa e à vinçût il “Premi Andrea Parodi” cu la cjançon “Dentrifûr” e tal stes an e je stade finaliste ae “Targhe Tenco” pe miôr “Opere prime” cul album “vERsO”. Intant che o scrivin no savìn ancjemò l’esit dal concors (o podês tignîlu sot voli uchì www.biancadaponte.it).
La Patrie dal Friûl e ten pes dôs cjantaudoris! ❚
✒ N.G.